Dul-an usa ka libong kabus nga pamilya dinhi ang gilauman nga malakip sa Pantawid Pamilyang Pilipino Program (4P's) o conditional cash transfer scheme sa Department of Social Welfare and Development (DSWD) 7.
Matud pa sa ulahing kasayuran gikan sa buhatan sa DSWD 7 nga ang ilang ahensiya dinhi sa rehiyon hingpit na nga nakatala og 43,000 ka mga kabus nga pamilya dinhi sa Central Visayas diin ang 1,173 usab ang gipaabot nga madugang nga matala sa mosunod pa nga mga bulan niining tuiga.
Dugang pa sa DSWD 7 adunay 708 ka mga bag-ong sakop sa 4P's program ug ang dugang pa nga 50 nga gidaghanon ang naggikan sa mga lokal nga kagamhanan sa lalawigan sa Sugbo ug ang dugang pa nga 177 ka mga pamilya ang naggikan sa 43 ka mga lungsod niini.
Sa Negros Oriental adunay 723 na ka mga kabus nga pamilya ang nakapahimulos sa maong programa nga naggikan usab sa 18 ka mga lungsod nga naglakip na sa lalawigan sa Siquijor.
Si Aileen Lariba nga maoy DSWD 7 4P's information officer sa iyang pamahayag ang nagkanayon nga pito na ka hut-ong sa mga benepisyaryo ang nakapahimulos sa maong programa sa kagamhanan sukad sa pagsugod niini niadtong tuig 2008 sa panahon pa ni kanhi Presidente Gloria Macapagal Arroyo nga maoy nagsugod ug gipadayon usab ni Presidente Benigno Simeon Aquino III.
Matud pa ni Lariba nga kapin usab sa 25,000 ka mga benepisyaryo ang gipaabot nga mogradwar na sa 4P's program nga maoy ilang ipaubos sa transition process alang sa agency's Sustainable Livelihood Program.
Gitataw niya nga ang mga bag-ong benepisyaryo sa maong programa gikinahanglan nga motambong sa orientation ug registration ug mosumitir og mga dokumento nga naglakip sa birth certificate sa ilang kabataan ug mga ginikanan, binunyagan ug marriage certificates.