Bugas nga smuggled gikawatan pa gyud

Gibuksan kagahapon ang tipik sa walo ka container vans nga gikawatan og gibana-banang 160 ka sako nga smuggled rice samtang anaa sa sulod sa Cebu International Port (CIP) yard.

Sa unang higayon human gisakmit ang maong sinakong bugas gikan sa Vietnam, nakaduaw ra gyud si Customs Commissioner Ruffy Biazon. 

Migawas man gud ang mga pagduda kaniadto nga utro siyang nakadawat niining pagpayuhot sa 1,169 ka sakong humay, mao nga wala motunga sa pagbukas niini niadtong Abril ug ang iyang deputy sa intelligence group nga si kanhi Heneral Danilo Lim lamang ang mitungha, bisan ang kinadak-ang nasakmit nga smuggled rice.

Gitan-aw kagahapon ang kahimtang sa mga bugas ug nasota mismo ni Biazon, uban ni Cebu Customs District Collector Edward dela Cuesta, ug mga sakop sa media, nga aduna nay daghang mga sako sulod sa ubay-ubay’ng mga container nga nangabasa na.

Gani, gi-report sa inventory team nga gipangulohan ni Arneth Manquiquis ug sa Customs Intelligence and Investigation Service (CIIS) nga gidumala ni Koko Holganza, nga aduna nay pipila ka container nga dili na maduolan og tawo tungod sa kabaho.

Apan bisan pa niini, makahihibulong kaayo nganong si Biazon wala gyud momando nga ipadali na ang subasta (auction) nianang nahibiling mga container vans nga puno pa sa mga smuggled rice.

Sa press conference kagahapon sa holding area sa customs, igo lang siyang miingon nga “soon” (duol na) ang sunod nga subasta. Kanus-a man nang duola? Unya na og tanang bugas mangadugta na?

Pabiling gisupak ang sugyot ni Agriculture Secretary Proceso Alcala nga adto ibaligya sa National Food Authority (NFA) ang mga bugas kay tua na ang mga bigtime rice retailers sa Manila nag-atang nga mokompra niini. Sa sugyot ni Alcala, ang maong kargamento paliton lamang sa NFA og P850 kada sako, apan wala gayoy kaseguroan nga ibaligya kini sa mga kabus sa maong presyo.

Subay sa regulasyon sa adwana, ang mga sinakmit nga kargamento sama nianang bugas gikan sa Vietnam nga gi-misdeclare sa consignee niini og mga stones slabs, i-dispose lamang kini pinaagi sa subasta. Kun kaduha mahitabo ang failed bidding (nga imposibleng mahitabo tungod kay adunay daghang interesadong mga retailers sa Cebu nga gustong mopalit), una pa kini ipaubos sa negotiated sale.

Dili ko mo-uyon niining negotiated sale nga kuyaw og mabaligya lang hinuon sa kinamuboan nga presyo ang maong mga bugas, ug ang mga magbubuhis nga mga Pilipino ang alkanse.

Alkanse na ra ba daan kay nakuhaan na kini sa gipangkawat (pilferage) sa maong kargamento diin ang usa ka Customs Police, usa ka guwardiya sa Opascor ug usa ka kanhi empleyado ang gitudlong responsable niini.

Doble na ang alkanse.