Angay ba sila kaloy-on?

Nalooy ko sa mga tawo nga naglinya kagahapon pa sa buntag palibot sa mga building gikan sa atubangan sa Comelec unya ngadto sa Lapulapu Street, dayon ngadto sa Magallanes ug sa P. Burgos dayon ngadto na ‘sab sa Osmeña Boulevard aron lang gayud makaparehistro.

Tiaw mo, pag-agi nako nianang pagka alas dos sa hapon ang tumoy sa maong taas kaayo nga linya sa mga tawo nga gustong magparehistro didto pa gihapon sa Magallanes. Basta kay hangtud sa hapit na ang alas singko kagahapon, wala gayud maatiman ang tanan.

Karong adlawa kay mao man ang katapusan nga adlaw sa pagpangrehistro sa Comelec nagtoo ko nga mosamot pa gayud kadaghan ang mga tawo nga mag-ambahan aron mamasin nga makaparehistro.

Pastilan, ayaw na lang mo pagpugos uy. Kadtong mga narehistro na ug gusto lang mobalhin sa pagparehistro sa usa ka barangay huwata na lang ang laing “continuing registration.”

Ako gani nga amigo pa namo ang mga election officers wala man gani ko mopugos sa pagparehistro sa akong anak. Total unya sa liwas sa eleksyon sa barangay mangrehistro na man ‘sab.

Ang ako lang diha mao nga makahuna-huna ko nga dili angay’ng kaloy-on kining maong mga tawo kay kun dunay taas kaayo nga higayon sa pagpangrehistro, dili ‘sab dayon moparehistro.

Unya dunay uban nga kun makaparehistro na, madani dayon sa kwarta nga idudho kanila sa mga kandidato aron maoy botohan. Malooy ka ana?

* * *

Nahimong daw “hot cake” si Senior Superintendent Noli Romana kay siya ang gisumsoman sa mga tabi-tabi karon nga gitudlo na siya nga direktor sa kapolisan dinhi sa dakbayan.

Kun tinuod nga si Romana walay gihimo nga kampanya sa illegal nga sugal dihang didto pa siya madistino sa Negros Oriental, dili siya angay nga idistino sa dakbayan sa Sugbo.

Unya mahibulong kita kun ngano nga si Mayor Michael Rama moinsistir man gayud nga kini si Romana maoy matudlo nga direktor?

Aw hinoon, sa ako na nga gibalik-balik pag-ingon nga angay’ng pamatud-an gayud ni Romana nga dili tinuod nga dili siya mokampanya sa illegal nga sugal.

Tiaw mo nga ang report nga akong nadawat, midagsang pagbalik ang masiao human si PRO-7 director Marcelo Garbo nabalhin didto sa Manila. Dunay report nga mibalik ‘sab ang video karera pero sa Ermita pa lang kuno. Kinahanglang molihok g’yud si Romana kay kun dili siya makapitol sa illegal nga sugal, maapil si Mayor Rama nga masaway kay siya ang gipili.

Ubos ra ba sa Republic Act 8551 gilatid gayud nga ang mayor maoy gihatagan og katungod sa paghimo og plano unsaon sa pagsumpo ang illegal nga sugal sa ilang dapit.