Ang pork barrel sa mga senador maoy labing dagko nga gahin sa tanang magbabalaod sa nasud nga gikan sa kagamhanang nasudnon alang kunohay sa mga espesyal nila nga proyekto sa tibuok nasud.
Tungod sa ilang pagkatinamod, ug inila kaayo ilabi na sa panahon sa election, usahay di na sila mahinumdoman sa mga lokal nga opisyal sa kagamhanan sama sa mga kapitan o konsehal sa barangay.
Makalimot ang ubang mga opisyal sa lokal nga kagamhanan nga gawas sa ilang kongresista, may senador pa silang kapangayoan og igasto sa mga proyekto nga alang sa ilang barangay.
Maoy hinungdan nga hangtud karon daghan kaayong barangay nga way asenso, tungod kay ang mga opisyal niini wa maglihok ug way nailhang senador nga kapangayoan nila og salapi alang sa ilang barangay.
Ang ubang mga senador nga malagmit hakog kaayo, aron ibulsa ang pork barrel nila, malipay usab nga way mangayo nga taga barangay kanila.
Busa kay way laing gastoanan, ila kining gibutang sa kunohay negosyo apan ang kuwarta tua ra sa ilang kaugalingong bulsa.
Gitawag nila kini nga ghost project o proyekto nga ila nang nasayrang daan nga binuang.
Kini sa tinguha nga labi pang moburot ang ilang bulsa sa kaadunahan sa katigayonan nga gikan sa pundo nga buhis sa katawhan.
Ang mga senador nahimong magbabalaod sa nasud gumikan sa ka-bright nila nga di katuohan nga dali nga malingla kun hisgotan ang mga negosyo nga binuang.
Ang pork barrel nila gigahin alang sa mga proyekto sa tibuok nasud nga ipaila kanila gikan sa barangay, lungsod, siyudad o kaha lalawigan.
Kaanugon sa pagsalig sa katawhan sa ilang katakus, di lamang sa pagdumala sa mga gimbuhaton nga may labot sa pamalaod kundi sa mga gimbuhaton nga may labot sa pundong salapi o pork barrel nga gipiyal kanila base sa gimbut-an sa balaod.
Busa anaa na sa pamuno nasud kun unsay iyang ikahukom niini nga kun sumadahon, usa kini ka matang sa anomaliya ug pangurakot nga panurambaw sa kampanya sa kasamtangang administrasyon batok sa graft and corruption.