St. Joseph Parish, Mabolo, Cebu City —Taliwala sa nagbunok nga uwan, nipaso dinhi ang 23 ka paresan sa managhigugmaay nga nakahukom pagbugkos sa ilang panagtiayon sa altar sa Simbahang Katoliko human sa pila ka tuig nga pagpuyo. Ang kalihokan nga gipasiugdahan sa mga programang Mag-TV Na! ug Kapamilya Mas Winner Ka (KMWK) kabahin sa Silverasyon sa ABS-CBN Cebu.
25 gyud unta ka paresan ang makaapil sa libreng kasal. Apan may duha gyud ka paresan nga wa kaapas sa daghan uyamot nga mga panginahanglan sa gobyerno ug sa simbahan. Ang kangil-ad sa panahon ug ang mas dagkong kakulian sa inadlaw-adlaw nilang pagpuyo wa hinuon kababag sa ilang paghingpit sa Sakramento sa Kaminyuon.
* * *
Si Cebu City Vice Mayor Edgar Labella nga usa sa mga nakumbinser namong moluhod sa mga kinasal may talagsaong tambag ug tanyag nga hinabang: Mga magtiayon sa Dakbayan sa Sugbo nga may mga anak na sa wa pa makasal kinahanglan nga mopirma og affidavit of legitimation aron nga ma-lehitimo ang ilang mga bata ug makalikay sa umaabot nga mga komplikasyon paghikay sa opisyal nga mga dokumento inig pang-eskuyla ug panrabaho na.
Proyekto ning Labella niadtong konsehal pa siya sa dakbayan. Gipadayon niya karong bise mayor na. Giabagan siya ni retiradong Visayas Ombudsman Director Edgardo Canton nga naa na karon sa iyang buhatan.
* * *
Nalingaw ug nahinuklog ang mga kinasal sa wali ni Padre Joy Danao nga ang gugma nga angay nilang saw-an mao ang gugma sa Ginoo ug di ang gugma sa yuta nga naglakip sa mosunod:
• Chewing Gum Love. Nga lami kaayong usap-usapon sa tam-is pa apan kun tab-ang ug nikaging na iluwa na lang kun di man ipapilit sa ubos sa mga lingkoranan sa simbahan; ug
• Platonic Love. Usa ray ilang plato sa wa pa makasal, duha nay plato human sa kasal, mas modaghan ang plato human sa napu ka tuig; ug human sa laing napu ka tuig mahurot nang plato kay gipanglabay sa way kinutoban nilang away.
* * *
Wa pa mahuman ang Silverasyon pagsaulog sa ika-25 nga tuig sa pagsibya sa ABS-CBN sa Sugbo. May umaabot pang laing hugna sa Grand Halad sa Kapamilya, ang labing dakong piyesta sa libreng mga pangalagad, ug Kapamilya Run, nga itumong pagpalambo sa kampanya pagpanalipod sa kinaiyahan, karong Oktubre.
Kanus-a saw-on ang Silverasyon sa mas dakong kasaulogan sa ika-60 nga sumad sa pagsugod sa ABS-CBN sa Pilipinhong telebisyon. Human nabugkos ang tibuok nasud ug tanang Pilipinhon sa tibuok kalibotan pinaagi sa taytayan sa kahanginan karon ang ABS-CBN motubag sa hagit sa modernong mga teknolohiya sa komunikasyon: Ang pagkahimong taytayan sa digital age ngadto sa matag diwa ug matag kasingkasing sa mga Pilipinhon. Bisan asa. Bisan kanus-a.
* * *
Email: leo_lastimosa@abs-cbn.com.