Ang dios miingon Pamalandong matag domingo
HULYO 21, 2013: Ikanapulo’g Unom nga Domingo sulod sa tuig
Mga Pagbasa: Gen. 18;1-10a/Sal. 15/Col. 1;24-28/Lk. 10;38-42
Si Marta ang maisip natong sanglitanan sa usa ka kinaiya nga maabi-abihon ug kanunay nga naglihok aron lamang maalagaran ang iyang bisita nga si Jesus. Tingali, siya ang nagluto pagkaon ug nagsilbi sa mga panginahanglan ni Jesus. Samtang si Maria iyang igsuon ang anaa sa tiilan ni Jesus naglingkod ug naminaw. Ang maong talan-awon nagdapit kaniya nga iyang ipadala ngadto kang Jesus ang iyang pag-angal nga unta matabangan siya sa iyang gimbuhaton. Agig panalipod usab kang Maria si Jesus ang mipasabot nga nakuha niini ang pinakamaayong pahat ug walay si bisan kinsa nga makakuha niini gikan kaniya. Angay nga pasalamatan si Marta sa iyang gipakitang kakugi sa pag-atiman sa ilang bisita nga si Jesus. Ang paghukngay ni Jesus kang Marta ang wala magpunting sa kang Marta mismo. Hinunoa, dunay mas halawom pa nga pagtulon-an nga iyang gipasabot niini.
Maayo ang action apan sa laing bahin maayo usab ang contemplation. Ang mga contemplatives maisip natong mga powerhouse sa simbahan. Wala man tuod sila sa mga mission fields o dili ba sa mga aktibong apostolado apan ang ilang pag-ampo adlaw ug gabii paagi man pud sa pagpangalagad nga dili angay natong ibalewala.
Kun ato kining ipahimutang sa atong tagsa-tagsa ka konteksto mahinungdanon kaayo nga atong balansehon ang mapalandungong pag-ampo ingon man ang atong mga buluhaton. Dili paigo ang pag-ingon nga: “My work is my prayer!†o dili pud haom nga magpunay lang pud og pangadye nga hawa sa tinuoray nga diwa sa pag-ampo.