Panabot sa usa ka bata mahitungod sa iyang kaugalingon

Kasagaran ang mga ginikanan ug bisan gani ang mga magtutudlo ang mohimo dayon og paglabel sa usa ka bata ingon nga maldito, dautan o salbahis kun siya makahimo og bisan unsang kasikas nga bunga sa iyang kasipat o kaluhag. Mao nga tungod niini ipahamtang dayon ang disiplina. Apan alang sa usa ka bata, ang maong matang sa disiplina nga direktang giigo sa iyang pagkatawo ang nakaapekto sa pagtan-aw niya sa iyang kaugalingon. Nakalimot ang kadaghanan kanato nga angayan natong ilain ang buhat gikan sa nagbuhat. Sama gud sa ginaingon pa nila: “God hates the sin but loves the sinner!” Wala kini magpasabot nga kun ang bata nanumbag ang iyang kinaiya dautan na lang gyud kaayo. Ang ginikanan nga makasabot sa iyang anak ang mopatawag sa iyang anak aron iyang maymayan ug pasabton nga dili maayo ang pagpanumbag. Apan ang ginikanan nga dili makasabot ang modiretso og bunal, kasaba, ug panghimaraot sa iyang anak ingon nga buluyagon ug dautan.

Hinumdomi

Kun ang imong bata wala makasinati og paghigugma ug pagsabot sa mga higayon nga siya makahimo og mga dili maayong buhat, anaa ang dakong posibilidad nga iyang tipigan ang usa ka madinumtanong pagbati batok kanimo ingon nga iyang ginikanan. Mas mograbe pa hinuon ang iyang pagpangita og paagi aron ikaw iyang suwayon, ug supakon sa bisan unsang paagi. Ning paagiha, ikaw na hinuon ang maugtas. -- Sumpayan pa