Kun masinati sa mga mananagat o mga tripulante sa barko ang pagpangambak sa higayon nga mopaingon na sa pagkalunod ang giluwanan nilang sakyanan sa kadagatan dili usab ikahiklin nga masinati kini sa mga dapit sa nasud niining mga adlaw sa pag-asumer na sa katungdanan sa mga bag-ong napili nga mga lokal opisyal.
Matud pa nila nga sa mga higayon nga naghulga ang dautang panahon sama sa bagyo mao usab ang nakahatag og kakulian sa paglawig sa kadagatan nga maoy hinungdan nga sagad nga pagahimoon sa mga nagpakabuhi sa kadagatan sama sa mananagat ug mga tripulante sa barko ang pagpadaplin o pagpamaybay sa pagpaabot sa paglurang sa nagdaut nga panahon.
Hinuon gitataw nila nga dili kalikayan nga adunay pipila nga mangarisgar sa pagsungasong sa pagtuo nga dili matarog ang iyang kalig-on nga maoy hinungdan nga adunay pipila kanila nga nasugamak na hinuon sa kaalautan human malunod ang giluwanan niining sakyanan sa kadagatan.
Kun malunod na gani ang giluwanan nilang sakyanan sa kadagatan maoy sagad nga pagahimoon sa mga nagluwan nga tripulante ang pag-iyahay og pangambak sa pagsiguro sa iyang kaugalingong kaluwasan.
Ang masinati sa mga tripulante o mananagat nga nakasugat og kakulian sa ilang paglawig sa kadagatan walay kalainan sa politika nga adunay magpakahilom nga politiko human mapildi ug adunay magpadayon sa pagsungasong nga magsilbi nga oposisyon.
Ang mat-an pa sa pinya nga mga kauban sa partido nga mga politiko maoy pagahimoon ang pag-ambak ngadto sa laing partido nga mao ang administrasyon sa pagsiguro ug pagluwas sa iyang kaugalingon nga matud pa sa mga Tagalog “tuloy ang ligaya!â€