Way edad ang kalamposan

Ang tawo dili gayud managsama ang kapasidad sa kinabuhi. Sama sa sakyanan ang bisekleta kutas kaayo isikad. Sa eroplano, habog kaayo ang linuparan apan may grabeng risgo kun mahagsa. Sa dagat, anaay dagkung barko nga may purohan usab nga ikaw malumsan sa paglaum. Wa kitay kalainan kun hisgutan ang kinutuban apan managlahi ang atong kusog o kapasidad sa paglahutay.

Unsa may kahimtang nato ning kinabuhia sama sa sakyanan, ampingan nga di dayon maguba inig hasmag sa mga pagsulay. Lig-onon pag-ayo nga maseguro ang pagmaneho nga makaabot sa padulngan. Ipahiluna ang kaugalingon nga sa dalan nga subayon, bisan abuton sa kangitngit makita gihapon ang kahayag sa pagpupo sa mga bunga sa atong panlimbasog.

Nasayud ba kita nga adunay tawo nga hilabihang katalagsaon? Nga wa gyud molunga hangtud nga na edaran na, diha pa niya naangkon ang ganti sa pailob. Nga kun kitay pasultihon wala na kini kapuslanan apan sa mga hingtungdan, igo lang nila gipamatuod nga bisan ang kataas na sa pangedaron, may paglaum gihapon nga makaangkon sa kalamposan nga gitikad sa dugay panahon.

Bag-ohay pa lang, may nagpangedaron og 80 anyos, hingpit nang abogado kay nakapasar na sa bar exams. May nigradwar pud sa kolehiyo nga 70 anyos na ang edad. Kaniadtong nagtungha-trabaho pa ko, may nakita kong mga edaran na gyud apan naninguha gihapon maka-eskuyla sa elementarya o hayskol. Ngano sila wala mawad-i sa paglaum bisan anaa na sila sa panahon nga talisawop na?

Tungod kay nakalimtan na nila ang edad. Wala nay pakabana sa kabilihon sa pagsaulog sa ilang adlaw nga natawhan. Alang nila, ang kalamposan way giilang pangedaron. Basta may kinabuhi pa, di ka lang moihap sa kataas sa panahon sa paghago, may daghan pang moabot nga oportunidad sa kinabuhi. Himoon nato silang ehemplo nga bisag edaran na, ang utok mas milantip nga nagka edad na.

Atong isilsil sa alimpatakan, nga way sukod sa edad ang pangandoy. Basta maningkamot ka lang sa pagtutok sa imong buot kab-oton sa kinabuhi. Uban sa pailob ug kamapa-inubsanon, dili imposible ang tanan imo gayud maangkon.

Kinahanglan lang nga ang mabatyagan mong kasakit imo gayud nga antuson.  Kay di man madawat ang katam-is nga dili katumbasan sa pagmalasakit. Apan bisag unsa pay buhaton nato, ang Dios ang may pagtugot sa atong kapalaran.