Hugaw’ng protesta

Duna na say bayolenting panagsangka tali sa mga iskuwater (ginganlan na ron nga informal settlers) ug mga polis didto sa Quezon City. Daghan ang nangaangol suma pa sa atong tinubdan.

Ang atong tinubdan nga usa ka Sugbuanong estudyante sa usa ka unibersidad sa Manila mi-report kanato pinaagi sa email nga matud niya “hugaw ang dinuwaan sa mga iskuwater.

* * *

Hugaw kuno kay gawas sa bato ug botelya sa sotfdrinks nga ilang ibato ngadto sa mga polis, nigamit pa gyud sila og ilang ihi ug hugaw nga gisud sa plastic.

Daghan ang nangaangol nga polis gikan sa mga bato nga gipauwan ngadto kanila. Apan lisud gyud kuno nilang madawat mao ang ihi ug hugaw.

* * *

Kining paggamit og ihi ug hugaw sa tawo nga sinud sa plastic kanunay na ron nga gamiton sa mga iskuwater nga makigsangka sa polis atol sa demolisyon sa mga bay sa iskuwater didto sa Manila.

Mikomedya ang usa ka polis ngadto sa atong tinubdan nga matud niya OK lang maigo og bato sa ulo, ayaw lang kuno maigo sa baho sa ilong. Hehe.

* * *

Ang mga lider sa protesta kanunay mopasangil nga ang kapolisan maoy tigpasiugda sa kagubot. Apan matud sa usa ka periodista sa Manila, dili man mo-erupt ang kagubot kun dili harason sa raliyista ang mga polis.

Oh, well, kada usa dunay rason. Ug ang kapolisan mao kanunay ang lupig sa rasonay.

* * *

TRIVIA. Nagsugod na sa  ilang trabaho ang mga bag-ong pinili nga opisyales sa kagamhanan. Wa tay ikasulti kundili ang pagpanghinaut nga wala masayop ang mga botante sa pagpili kanila. God bless. Daghan salamat sa atong mga magbabasa diha sa Tabada St., Alumnus ug Cabreros. Salamat sa inyong suporta sa Banat News.