EDITORYAL - Mabuhi ang bag-ong pamunoan

Sugod ugma sa ala 1:00 sa hapon bag-o na ang  administrasyon sa lungsod, syudad, lalawigan, distrito ug  sa senado sa nasud  nga  Pilipinas.

Matag usa nanglantaw alang  sa kaayohan  sa nasud busa mao kini  ang  gitutokan  sa kadaghanan aron  masuta kun  unsa  kaligdong  ang  mga  pulong  ug  mga pasalig  sa  matag  usa  nga  gipili  sa katawhan  sa miaging  Mayo 13 nga election.

Nasayud ang  mga botante kun  unsay  kapasidad  sa  mga  mangatungdanan karon  sa natad sa pagpalambo  sa tagsa-tagsa  ka  lugar  gikan  sa lungsod, syudad ug  lalawigan.

Mahimong  ang  uban  kanila wala  botohi  apan  tungod  kay mayoridad  kanila sa ilang  lugar  ang  mibotar, nagpasabot  nga  pulos  mga  maayo  og abilidad  ang  maong  mga opisyal.

Ang tawo bisan  unsa  kagahi  sa balatian  mahumok  kini  segun usab sa kahumok  og  balatian  modala  sa usa ka opisyal  nga  nanguna  sa ilang  dapit.

Kay bisan  unsa  ka  matawag  nga  maayo  og  abilidad  sa napili  nga opisyal  sa  lungsod,  syudad  ug lalawigan, maglisud  ra ba  sila  sa pagpatuman sa mga  butang  ikaayo  sa   matag usa  kun  ang  mga  molupyo  di  makighiusa  kanila.

Busa  nagkinahanglan  ang usa  ug  usa  sa  pagsinabtanay  aron  nga tambayayongan  ang  gimbuhaton  sa  ikaayo  sa  tanan.

Ang  maong mga  kaayohan  naglakip  sa, una  sa tanan  ang  panginabuhi, panglawas, edukasyon ug  labaw  sa tanan  ang  kalinaw  ug  kahusay  sa katibuk-an.

Anhi  dinhi  sukda sa matag  usa  ang  matang  sa opisyal  sa ilang  lugar  kun  kaantigo  ba  sa  pagdumala  niining  tanang  aspeto  nga  alang  sa kalinaw  ug  kahusay  sa pagpuyo sa  tanan.

Ang  pagsunod  sa usa ug usa sa  mga lagda  sa balaod  aron  malinawon  ang  iyang  pagpuyo  mag-agad  sa maayong  liderato  sa nanguna  nga  mga  opisyal  sa lugar  nga  iyang  gipuy-an.

Bisan  siya  barumbado  kun  ang  lider  sa  usa ka  komunidad may tukma  nga  liderato, dako  og  purohan  nga  magbag-o  siya sa kinabuhi  ug  gikan  sa  kasamukan, motunhay  ngadto  sa kamalinawon.

Ang  kausaban  niya  sa kinaiya,  maoy  mohatag og  paagi aron  malinawon  ang  iyang  pagpuyo uban  usab sa  mauswagong  panginabuhi  sa iyang  pamilya, alang  sa malinawong  palibot  sa barangay, lungsod, dakbayan  ug  lalawigan.