Aron dili mag-away

Adunay pipila ka magtiayon nga kanunay nato madunggan nga permi samok ang panimalay. Maglalis ug magsininghagay ang bana ug asawa. Mora’g sama sa iro ug iring nga kun magkalisud magrambolay ug daghan pang mapagan. Niadtong sa manag-uyab pa, haskang kaparaygon nga bugnaw kaayo ang mga tingog. Pinaluray nga ingon sa mahinangpon ug mainampingon nga dili makasilo.

Magkadugay, inanay nga molubad kay mao na may ilang nahimong gawi nga sa gamay lang nga bikil mosilaob na ang kasuko. Ang usa’g-usa mao nay  bation ang kapintas tungod kay dili na mao ang nabatyagang katam-is diha sa gugma nga makalipay. Ug unya, kini na ang sinugdanan sa mga tentasyon nga ikadaut sa kaminyuon. Nga sagad mosangpot gayud sa hugtanong panagbuwag.

Busa aron dili na  mag-away, may mga butang nga angay natong himoon :

Magkat-on nga palabyon ang kainit sa buot o magpasensya–ayaw tan-awa permi ang iyang kasaypanan. Likayi nga mosugnib sa kainit o kasuko,  pinaagi nga pasagdan makapahungaw sa iyang sentimento, aron masayon nimo dalhon ang pagsabot nga mopapas sa mga hinungdan.

Dili mo na tagdon ang mga ginagmay nga butang, basta di lang makadaut nimo o sa pamilya mo. Kay makasipok lang na sa atong paminsar ug makaguba sa maayong buhaton.

Magsultihanay nga mabugnawon–Kun may tuyo kang imbistigahonon sukiton dayon ang paris mo, kinahanglan nga buhaton mo kana sa lugar nga walay tawo nga makadungog kun di kamo rang duha. Aron bisag unsa man ang ma-estoryahan malikayan nga matandog ang garbo. Deretso na sa problema nga dili na ilabot o balik-balikon paghisgot ang mga nangaging panghitabo.

Maminaw sa iyang  katarungan–Kun gisukit ka sa paris mo gumikan sa gamay nga kasaypanan, atong hatagan nga mapaminaw usab ang iyang katarungan, nganong nabuhat kini niya. Kuhaa ang opinion ug timbanga, basig sa iyang hunahuna mas makaayo kini kanimo.

Sagad gud kun masultihan gani kita , dili maminaw ang atong garbo, aron dunggon ang mga katarungan. Ayaw buhata nga kanunay magsukit-sukit bisa’g way hinungdan. Kinahanglan magrespetohay dili kay makig-indigay kun si kinsa ang mas maayo’g abilidad.

Busa himoa kining hiyas sa kinabuhi nga maoy mopalig-on ang gugma nga mapinanggaon ug masinabuton, aron molungtad ang panag-ubang makalipay.