Sa 888 News Forum didto sa Marco Polo Plaza Hotel kagahapon, gibalik-balik gayud ni Mayor Michael Rama ang nahimong sayup sa kadagkoan sa kapolisan nga mitudlo og director sa Cebu City Police Office nga wala mag-agi kaniya.
Apan mapanagan-on kaayo ang mayor nga motubag sa pangutana kun nagplano ba siya nga mopasaka og kaso batok sa kadagkoan sa Camp Crame o kaha sa Police Regional Office-7 nga wala motuman sa balaud.
Klaro man kaayo sa balaud nga wala tumana sa kadagkoan sa kapolisan ang gilatid sa Section 63 sa Republic Act 8551 nga ang mga mayor sa dakbayan o lungsod maoy gihatagan og katungod pagpili kinsa ang ilang hepe sa kapolisan.
Basi sa balaud, ang mayor maoy mopili gikan sa labing minus lima ka ngalan sa mga “eligibles†nga irekomendar sa kadagkoan sa kapolisan. Mao kini ang timan-i, ang kadagkoan sa kapolisan morekomendar ug kun makapili na ang mayor, itudlo dayon nila sa katungdanan.
Kining isyu gituki nato nga wala magpasabot nga supak kita sa pagkatudlo ni Senior Superintendent Mariano Natuel sa pwesto kay si Natuel takus kaayo nga modumala sa pwesto kay nadistino siya sa dakbayan sukad nga Inspector pa man tingali kadto ang iyang ranggo.
Kun ako ang anaa sa pwesto ni Mayor Rama, dili lang kay kutob ra ko sa pagtagawtaw... ako g’yud nga ipadangat sa hukmanan kining maong isyu aron nga masuta kun tukma ba ang gihimo sa kadagkoan sa kapolisan.
* * *
Tinuod g’yud kaha nga walay laing mga botika nga gusto nga maoy mosuplay og mga tambal sa mga beneficiary sa CHAMP? Kini ba nga gitawag og City Hospitalization Assistance and Medical Program sa dakbayan sa Sugbo.
Giadto na usab nako kaniadtong Lunes sa hapon ang Pro-CHAMP, usa sa mga botika nga gi-accredit sa dakbayan nga mosuplay og tambal sa mga CHAMP beneficiaries.
Wala g’yud ko masayup, ang maong “botika†nga susama ra g’yud tawon sa “sari-sari store†nga anaa mahimutang sa silong sa usa ka wala pa gani mahuman nga building sa eskena Sanciangko ug Panganiban, wala g’yud makahatag sa akong gikinahanglan.
Miadto ko sa atbang nga Botika sa Masa, laing gi-accredit nga botika, arang-arang og gamay sa sari-sari store, apan wala gihapo’y stock. Naobserbahan hinoon nako nga maayo motagad ang nagbantay dili sama sa kawani sa City Hall didto sa pikas nila nga botika sa B. Rodriguez nga mugtok kaayo og dagway, sa ato pa nihit ang pahiyom.
Miadto ko sa gipasigarbo nga botika mismo sa CHAMP sulod sa Cebu City Medical Center, apan gikandadohan, sirado. Hay, kapait! Kamo diha, ingon ba usab niini ang inyong eksperyensya? Text sa 0933-570-0853.