Na-ilad sa mga bata

Maayong pagka-ilad sa kapolisan sa Talisay dihang ilang gidakop ang usa ka amahan nga gipasanginlang mi-unay og patay sa iyang 13-anyos nga anak lalaki didto sa Barangay Kampo 4.

Si Reynaldo Labitad gidakop sa kapolisan dihang mismong duha niya ka laing mga anak maoy mitug-an sa kapolisan nga gipatay sa ilang amahan ang ilang maguwang nga si Warren. Matud sa duha ka mga bata nga nagpangidaron og 11 ug 9 anyos nga gidunggab ug gigulgol sa ilang amahan ang liog sa ilang igsuon sa wala pa kini isulod og sako.

Nagkabuang intawon ang kapolisan og pangita sa lawas ni Warren sa pagtuo nga gilubong ni sa iyang kaugalingon nga amahan. Si Reynaldo hugtanong nanghimakak sa pasangil sa duha niya ka mga anak, apan ang kapolisan mas nihatag og gibug-aton sa pangangkon sa mga bata hinungdan nga ilang gidakop ug gipriso ang amahan.

Natibuok ang pagtuo sa kapolisan nga gipatay gyud ni Reynaldo si Warren tungod sa mga lama sa dugo nga ila kunong nakit-an. Apan samtang nag-andam na ang kapolisan sa kaso kalit nga nibutho ang bata didto sa police station uban sa uyoan niini. Buhi diay’ng dako ang bata, mikagiw ni didto sa iyang uyoan sa lungsod sa Asturias.

* * *

Inay manglipaghong sa kauwaw ang kapolisan sa Talisay tungod sa ilang gihimo nga pagdakop dayon sa amahan basi lang sa gitug-an sa duha ka bata bisan wala pay igo nga ebidensiya, gibarugan nalang nila ang pagpasaka og kaso.

Dili na hinuon parricide apan duha ka counts sa kasong child abuse ug frustrated murder ang ilang gisang-at didto sa piskaliya. Ilang gihimong ebidensiya batok ni Reynaldo ang pangangkon sa mga bata nga sila gidagmalan ingon man usab ang pasangil sa kapuyo niini nga gibaharan siyang patyon.

Pastilan, wala gyud motagam ang kapolisan. Nituo lang gihapon mo sa pasangil sa duha ka mga bata? Kun namakak ang maong mga bata dihang nagtumotumo sila nga gipatay sa ilang amahan ang ilang igsuon unsa may atong kasigurohan nga wala sab sila mamakak niining maong pasangil?

Dako na og sala nga nahimo ang kapolisan sa ilang pagdakop ug pagpriso ni Reynaldo bisan og wala sila’y ebidensiya, ayaw na ninyo og dugangi. Ang angay ninyong buhaton mao ang pagpangayo og dispensa sa sayop ninyong nahimo. Pasalamat mo nga pobre intawon ang inyong gibuhatan sa ingon, kun nahitabo pa nga adunahan ug makabayad og abogado ang inyong gidakop siguradong lamokon mo og kiha. Inyo nang gilapas ang tawhanong katungod sa pobre.

Dili sab igong rason ang pasangil sa kapuyo ni Reynaldo nga gihulga siyang patyon aron inyong kihaan og frustrated murder. Ang gihimo sa kapolisan tataw nga pagsalbar nalang sa ilang kaugalingon sa illegal nilang pagdakop ni Reynaldo.

* * *

[email protected]