Sa una niyang termino, miarangkada dayon ang beautification project ni Mayor Michael Rama sa dakbayan sa Sugbo. Nahimong pilot area ang Osmeña Boulevard, gikan sa Provincial Capitol hangtud sa Sanciangco Street.
Daghan sa mga Sugboanon ang nahimuot niini. Nanindot tuod ang mga sidewalk, komportable na lakwan sa mga pedestrian ug daganan sa mga mag-jogging matag buntag.
Sa una pa lamang nga termino ni Mayor Rama, daghan tuod siya’g nahimo pagpanindot sa kadalanan sa dakbayan. Kini naglangkub usab sa pag-repair sa mga drainage sa downtown area nga kanunay bahaan panahon sa ting-ulan.
Apan niining iyang ikaduha nga termino, angay nga hatagan og prayoridad ni Rama ang paghipos niining mga libodsuroy sa dakbayan. Nagkadaghan na kining mga nagpuyo sa karsada nga nagdala og hugaw nga imahe sa siyudad.
Dugay na kining problema sa dakbayan. Apan morag gi-tolerate lamang kini sa nangaging mga administrasyon. Hangtud nga midako na kini ug lisod nga mahatagan og solusyon sa kagamhanan sa dakbayan.
Dili tuod ikalimod nga naghatag og hugaw nga imahe kining mga nagpuyo sa sidewalk. Sagabal gayud sila sa mga commuter ug sa mga turista sa dakbayan.
Hinuon makaluluoy ilang kahimtang gumikan lagi kay wala gayud sila’y kapuy-an. Apan, sa laing bahin, ngil-ad usab silang tan-awon nga magbuy-od sa mga sidewalk ug magpunay og pangayo sa mga lumalabay.
Hinaut nga mohimo og dinaliang aksiyon si Rama ning maong problema niining ikaduha niya nga termino. Kini kong gusto siyang ma-maintain ang beautification project sa dakbayan nga iya nang nasugdan.