Bilib ko sa kaligdong ni BIR Commissioner Kim Henares. Nasulti na na nako dinhi sa pipila ka higayon. Di ko managana pagbalik sa akong pagdayeg sa isog niyang kampanya batok sa gipasanginlang mga tikasan sa buhis. Apil nang mga alyado ni Presidente Noynoy Aquino sa Sugbo ug ubang bahin sa nasud. Apan ang kaguliyang sa iyang programa pagbag-o ug pagtarung sa mga resibo nagpakita nga di kamao si Henares unsaon pagpahibawo ang mga magbubuhis sa mahinungdanong kausaban nga iyang gipasiugdahan. Di hinuon niya monopoliya kining maong suliran. Mao sab ni gisagubang sa ubang mg tagduma sa mga buhatan sa gobyerno ug bisan sa pribadong sektor.
* * *
Maong mangahas ko pagtanyag og giya ngadto nila. Di na paigo ang karaang panginahanglan sa balaod nga kinahanglang ipublikar sa lokal o nasudnong pamantalaan una mapatuman ang bag-ong mga lagda. Naumol ang maong panginahanglan dihang mga pamantalaan pa ang bugtong tinubdan sa kasayuran--lunlon kalingawan pay gisibya sa radyo ug telebisyon ug wa pay internet.
Gawas sa kaguliyang sa BIR, ang public auction sa Bureau of Customs sa pinayuhot nga Vietnamese rice sa niaging semana laing pananglitan sa kakuwang sa kasayuran. Pila ray nahibawo, kinabag-an sa mga magbubuhis nakugang na lang sa subasta. Kay sama sa BIR gipili sa customs ang limitadong paagi pagpahibawo sa publiko.
* * *
Inay magpaabot nga pangayoan sila og kasayuran sa media, ang mga buhatan sa gobyerno ug pribadong sektor maoy angay’ng motanyag sa kasayuran nga kinahanglang mahibaw-an dayon sa publiko. Pagpalambo sa sistema sa komunikasyon sa publiko nga ilang gialagaran maoy usa sa labing mahinungdanong gimbuhaton sa mga tagduma.
Naandang paagi mao ang pagluwat og press release o pagpatawag og press conference. Nga maoy labing sayon ug labing laktod nga paagi pagsabwag og kasayuran ngadto sa labing daghan. Apan taliwa sa kadaghan sa karibal nga kasayuran nga gimantala ug gisibya sa media matag adlaw, dunay mas epektibong paagi pagpakatap sa dinaliang mga mensahe.
* * *
Ang mga ipanulti sa press release ug presscon kausa ra mogawas, kun kahatagan og luna sa print ug broadcast media. Gawas lang kun kontrobersiyal kaayo, mahimong matabonan sa mas bag-o nga mga balita ug kontrobersiya. Maong mas epektibo kay sa pagdapit sa tanang media ang pakiglambigit og usa lang ka kasaligan nga media organization. Kay ang mapili nga media organization mas maningkamot nga mapadangat ang kasayuran ngadto sa labing daghan. Mohatag sa tanang luna pagbalikbalik sa kasayuran aron mabasahan, makit-an ug mabatian sa mas daghan. Lahi sa mga makadawat sa press release o makatambong sa presscon nga moisip sa kasayuran nga usa lang sa daghang balita nga kinahanglang isibya, ang palihugon nga media organization modawat sa mas dakong responsibilidad--makapasigarbo kun mulampos o maapil sa kauwaw kun mapakyas.
* * *
Email: leo_lastimosa@abs-cbn.com