Pilipinas vs. duha ka China

Pipila ka mga business group leaders nagtoo nga mas molambo ang Sugbo niining pagkapili pag-usab ni Cebu City Mayor Michael Rama ug sa paglingkod sa bag-ong mamunuan sa Kapitolyo.

Ilang gipaabot nga mas bukas na ang investment policy sa South Road Properties (SRP). Morag nagpasabot sila nga ang gipalabing mga negosyante mao lamang ang nakapahimus karon sa SRP.

Nagtoo usab sila nga magkauyon ang mga opisyal sa City Hall ug sa Kapitolyo tungod sa batasan sa mayor ug gobernador. Ang paghimo og Mega Cebu- usa ka panglantaw sa dungan nga pag-uswag sa pito ka mga siyudad ug unom ka lungsod- dako na kaayo og katumanan, sumala ni Gordon Alan Joseph, president sa Cebu Business Club.

Ako nagtoo nga mahitabo lang kini kun dili na magsigi og babag ang mayoriya sa city council nga gikontrolar sa Bando Osmeña - Pundok Kausaban (BOPK).

* * *

Wa pa gani masulbad ang atong problema batok sa People's Republic of China kon China ania na usab kining protesta sa Republic of China konTaiwan batok sa atong gobiyerno.

Ang Taiwan, nga giila sa China nga usa sa ilang probinsiya, nasuko tungod sa pagkamatay sa usa sa ilang mananagat sa dihang girapido sa mga sakop sa Philippine Coast Guard ang ilang gisakyan kay, sumala pa, buot unta kining mobangga sa barko sa Coast Guard sa dihang ila kining giabog gawas sa usa ka gamayng isla nga sakop sa Spratly islands.

Kining Spratlys usa ka grupo sa kapin sa 100 ka gagmay nga mga isla nga gilibutan sa rich fishing ground ug gituhuang daghang deposit sa gas ug oil. Kining tanan giangkon sa China, Taiwan ug Vietnam, samtang ang uban giangkon sa Pilipinas ug Malaysia.

Mga 45 ka mga isla niini giokupar sa pipila ka sakop sa militar sa China, Taiwan, Malaysia, Vietnam ug Pilipinas.

Ang Brunei miistablisar og fishing zone nga misapaw sa southern reef apan wala kini mohimo og pormal nga claim. Hangtud karon anaa pay mga barkong iggugubat ug fishing boat sa China ang maong dapit.

Bisan kun dili magkaduol kining China ug ang Taiwan apan naghiusa kining duha ka mga nasud nga Insik pagpakig-away sa atong nasud.

Agi’g protesta, ang atong mga overseas Filipino workers (OFW) sa Taiwan giamong-amongan na sa mga Taiwanese. Dili na usab sila manawat og mga Pilipino nga buot motrabaho didto sa ilang nasud. Gikanselar na usab ang ilang imbitasyon sa Gilas Pilipinas alang sa pagduwa sa Jones Cup nga himoon didto sa Taipeh, Taiwan.

Ang labing grabeng insulto mao kining wala pagdawat sa ilang presidente sa pasaylo nga gipadangat ni Pres. Aquino kay dili kuno kini sinsero. Nganong nasayud man siya nga dili sinsero si PNoy sa iyang gipangayong dispensa?

Samtang nagpadayon ang imbestigasyon sa maong insidente uyon ako sa baruganan sa atong gobiyerno nga dili magpahudlat sa pagpanghadlok niining duha ka China.

 Angayang mahinumduman niining duha ka mga Insik nga nasud nga daghan usab ilang mga paisano nga ania nagpakabuhi dinhi sa Pilipinas. Ang uban ilegal pa gani ang negosyo.

Nahadlok ako nga dili na unya makapugong ang mga Pilipino sa pagpangdaugdaug sa mga Taiwanese sa atong mga trabahador didto sa ilang nasud ug mobawos na unya kini sa ilang gibuhat.

Akong hangyoon ang mga Pilipino nga atong ipakita ang atong panaghiusa pagbarug batok niining maong mga nasud inay manaway sa atong gobiyerno.

Sayud ako nga dili kita magmadaugon kun gubaton kita sa China apan magpanagana hinoon sila kay anaa man ang United States (US) ug ang mayoriya sa mga sakop sa United Nations (UN) nga modapig kanato. Ang Taiwan usab nagsandig sa US kay wala pa sila’y salig sa China.

* * *

Dako og tulubagon kining mga barangay kapitan nga nidawat og campaign funds apan wala naka-deliver sa botos sa ilang mga kandidato niadtong niaging eleksiyon. Nahitabo kini sa halos tanang dapit sa Sugbo.

Email: [email protected].