Gi-report kagahapon sa The Freeman nga 10 ka mga driver sa multicab ug minibus nasuta nga positibo sa paggamit og ginadiling drugas pinaagi sa roadside drug testing sa Land Transportation Office -7 ug Cemex Corp. sa Naga city.
Sumala pa sa direktor sa LTO-7 nga si Raul Aguilos nga ang lisensiya sa 10 ka mga drayber rebokahon kun mamatud-an nga positibo sa confirmatory test sa Manila.
Kun ma-revoke, kining mga draybera dili na makakuha og lisensiya gawas kun mopaubos og rehabilitasyon sa mga sentro nga accredited sa Department of Health ug Philippine Drug Enforcement Agency.
Kinahanglan usab silang mobayad og multa nga P10 mil.
Uyon kaayo ko niining roadside drug testing tungod sa kadaghan nang mga karahong drayber nga dili na makahunahuna sa seguridad sa mga pasahero tungod kay ang utok pulos na aso sa shabu.
Pero, taym pa ra gud. Dili ba dugay na man kining roadside drug testing nga gihimo sa pagpangulo ni Aguilos sa LTO-7?
Sukad gihimo kining roadside drug testing, wala pa ko makadungog o makabasa og balita kun pila na kabuok drayber ang narebokahan sa ilang lisensiya nga nakabayad og multa nga P10 mil ug mipaubos og drug rehabilitation.
Maayo lang unta og wala kini himoang gatasan kun tinubdan sa korupsiyon sa LTO-7 kining roadside drug testing.
Kay sa kadugay na nilang gihimo, wala ko makadungog og drayber nga wala na maka-drive kay dili na ma-relesan og lisensiya tungod sa pagka-positibo sa roadside drug test ug confirmatory test sa Manila. Ato kunong hagiton si Aguilos sa pagpublikar pila na ka drayber ang hangtod karon wala na makabalik og drive kay positibo sa roadside drug test unya positibo usab sa confirmatory drug test.
Aduna koy kaila nga taga-Talisay nga iyang pag-umangkon nadakpan sa roadside drug testing. Apan hangtod karon nagsige lang gihapon og drive kay nakabayad og P10 mil. Sa dihang gipangutana nako akong amigo kalabot sa confirmatory test sa Manila, igo lang mingisi. Ambot unsay iyang gipasabot.
Pero walay komedya, kun positibo sa roadside drug testing, posible ba nga ma-negatibo sa confirmatory test?
Kay kun wala gyu’y ni-positibo sa confirmatory drug test, magduda na ko ana.