Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Daghan ang nag-ingon nga mahinayon gayod ang barangay election sa bulan sa Oktobre niining tuiga subay sa bag-o lang nga giluwatang baroganan ni Presidente Benigno Aqunio III nga maoy hinungdan nga gipaabot nga mokisaw na usab ang politikanhong kalihokan sa kabarangayan.
Kun mahinayon ang barangay election maoy mapaabot nga ang nagkaatbang nga kandidato sa bag-o lang nga nahuman nga midterm election mosuporta usab sa pinansiyal nga panginahanglan sa mga nagkaatbang nga kandidato nga mga barangay opisyal sanglit dili man usab mahimo nga ilang pasagdan ang politikanhon niining kalihokan.
Sa pagkisaw sa politikanhong kalihokan maoy mamatikdan nga ang mokandidato alang sa barangay election mahimo na nga matinagdanon ug mapahiyomon sa ilang mga silingan ug motanyag pa sa pagtabang sa mga kabus nga nanginahanglan sa ilang lugar.
Ang pipila kanila magporma og grupo nga maoy mokandidato nga masakbang sa mga naglingkod nga mga barangay opisyal ug magsugod na usab kini sa pagpanukiduki sa mga palpak nga serbisyo nga mahimo nilang isyu sa panahon sa ilang pagpangampanya.
Ang kakulang sa pagtagad sa barangay kapitan sa pagtubag sa serbisyo nga gikinahanglan sa mga molupyo maoy mga nag-unang isyu nga gamiton sa mga kaatbang nga kandidato sa pagguba sa liderato sanglit nagpabaya man kini sa katungdanan.
Dugang pa nila nga ang umaabot nga barangay election sa bulan sa Oktobre niining tuiga maoy apas sumpay nga kasikas politika dinhi sa nasud nga ang kabanay o managsilingan nga managkalahi ang kandidato nga gisuportahan masumpayan usab ang ilang panagbungol.