Mga reklamo
Kining mga waiting shed gitukod aron nga adunay kapasilongan ang mga tawo nga mag-atang og kasakyan ilabi na kun init kaayo ang panahon o kaha mag-uwan.
Apan nakadawat ko og report nga ang waiting shed diha sa barangay Bulacao dili halayo sa usa ka tunghaan gigamit man isip karendereya.
Atong awhagon ang kapitan sa barangay diha nga aksyonan nimo kining maong reklamo kay ang mga tawo dili na hinoon makapasilong.
* * *
Dalia ra gayud mausab sa batasan sa tawo no? Kaniadto kini si Konsehal Edgardo Labella dali ra kaayo motubag kun imong padad-an og text message, mao pa gani ang manawag aron ipabalita ang iyang resolusyon. Apan human siya midaug pagka bise mayor, dili na man motubag bisan pa’g tawgon. Paita, maayo unta og dili magdayon kining imong batasan sir Edgar.
Kamong uban diha nga nakadaug, ilabi na kun mga bag-o pa nga opisyal, ayaw gayud ninyo usba ang inyong batasan aron dili kamo masaway.
* * *
Atensyon mga kauban nako nga road law enforcers sa Land Transportation Office (LTO) ug Land Transportation Franchising and Regulatory Board (LTFRB).
Tan-awa kuno ninyo kining sakyanan nga ang plaka GRV 306 usa ni ka Kia Pregio, unya lain pa nga sakyanan nga ang Plate No. GNZ 685 kay adunay nag-report nako nga gigamit kuno ni sa “colorum operations.â€
Anha kuno kini kanunay nga mamik-ap og mga sakay sa MEPZ sa Lapulapu. Duna lay nabalaka kay basin og maaksidente, makalolooy ang mga sakay.
* * *
Gisumsoman sa mga tigpaminaw sa DYLA ang isyu nga paghatag ni Mayor Michael Rama og mga nindot kaayo nga sakyanan sa mga barangay kapitan.
Gibalik-balik na bitaw nako kaniadto pa nga usa ka pamolitika ang gihimo ni Mayor Rama nga paghatag og mga sakyanan ngadto sa mga barangay kapitan.
Mao kana ang rason nga pwerteng dagkoa og ngisi sa mga kapitan sa barangay nga giisyuhan og mga mahalong sakyanan sama sa Toyota Hilux.
* * *
Dihang gipangutana nako si Mayor Rama kabahin sa problema sa City Hospitalization Assistance and Medical Program (CHAMP) hapit dili motubag.
Mora ba og kuwang siya’g pagtagad sa maong isyu nga aron unta dayon masulbad ang problema nga aron dili na magbagulbol ang mga kabus. Aw tan-awon nato kay matud sa mayor iyang gitahasan si Belinda Navascues nga iyang executive secretary nga maoy mohimo og pakisusi sa mga isyu nga atong gipadangat kinutlo gikan sa reklamo gikan sa mga CHAMP beneficiaries.
Kun walay himoon si Belinda Navascues, pahibaw-on ko kamo nga kutob ra sa laway sa mayor ang maong kamandoan.
- Latest
