Matag Mayo 28 kada tuig atong saulogon ang National Flag Day. Kini aron sa paghinumdom niadtong makasaysayanong adlaw diin unang gipakayab-kayab ang atong bandera human pildiha sa atong rebolusyonaryong kasundalohan ang mga Katsila adtong tuig 1896.
Kining kasaulogan sa National Flag Day molanat kon modagan kini hangtud Hunyo 12 diin ato na sab nga saulogon ang atong Independence Day kon Adlaw sa Kagawasan.
* * *
Panahon kon kahigayunan kini alang kanato sa pagpakita sa atong patriyotismo kon gugma sa atong yutang natawhan.
Didto sa Singapore, atol sa ilang National Day ang mga kabalayan, gagmay ug dagko ug gipanag-iya’g pobre o datu, modispli gayud sa ilang nasudnong bandera.
Ang mga sakyanan -- kotse, truck, LRT ug MRT, motorsiklo, etc. -- mopakayab gyud sa bandera sa Singapore.
* * *
Matud pa sa usa ka Singaporean journalist nga atong nakaila, walay balaud nga nagsugo sa katawhan sa pagdispli sa ilang national flag apan matag pamilya duna gyuy tinipigan nga Singaporean flag nga ilang idispli sa ilang bintana atol sa ilang National Day nga maoy tugbang kon tumpas sa atong Indepence Day.
Hinaut nga ato sang saulogon ang atong National Flag Day susama sa kadasig sa mga Singaporean sa pagsaulog sa ilang adlaw sa bandera atol usab sa ilang adlaw sa kagawasan.
* * *
TRIVIA. Pahalipay ngadto sa tanan-tanan tang kahigalaan nga nangapil ug nanaug sa miaging eleksyon. Salamat sa inyong suporta sa Banat News.