Pagka nindot sa gihimo sa atong mga opisyal sa dakbayan sa Sugbo nga mohatag sila og tambal alang sa mga nanginahanglan nga lumulopyo.
Gisugdan pagpatuman ang City Assistance Medical Program (CAMP) panahon sa administrasyon ni kanhi mayor ug karon Kongresista Tomas Osmeña,
Dayon, pagbanos ni Mayor Michael Rama gipalambo pa gayud ang CAMP ug gihinganlan na og City Hospitalization Assistance and Medical Program kon CHAMP kay apilon na man pagtabang kadtong ma-ospital.
Daghan ang nakapahimulos niining maong programa, apan nasuta nako nga daghan ang angay’ng usbonon kun gusto gayud ang atong mga opisyal nga makaserbisyo sila sa katawhang kabus.
Ubos sa lagda sa CHAMP, ang usa ka lumulopyo dinhi sa dakbayan makapahimulos og P5,000 nga kantidad sa mga tambal ug kun sila ma-admit ang kinatibuk-an nila nga mapahimuslan P25,000.
Apan mag-unsa man ang dakung kantidad nga gitagana sa dakbayan alang sa matag lumulopyo kun dili makuha ang tambal kay dili man hitsas sa mga tambal ang botika nga gikontrata sa City Hall nga mohatag sa tambal?
Tulo ka botika ang gikontrata sa dakbayan nga adto makuha ang mga tambal. Kini mao ang Pro-Champ nga anaa mahimutang sa eskena Panganiban ug Sanciangko, ug sa Dominique Pharmacy ingon man sa Botika Inay nga anaa mahimutang sa B. Rodriguez.
Misuway ko og pahimulos sa benepisyo nga gitanyag sa City Hall apan pastilan, nabulgar hinoon ang mga palpak sa maong programa.
Dili kay ako ra ang nagreklamo, daghan pa. Una nako nga pangutana, nganong gagmay man nga botika ang gikontrata sa City Hall alang sa CHAMP?
Kun dagku pa tingali nga botika, tingali hitsas gayud sa mga tambal. Mahadagan-dagan intawon ang mga tagtungod sa pasyente nga ang uban wala gani ikaplete.
Nalooy ko sa usa ka taga Talamban. Ang iyang bana nagkinahanglan nga operahan dayon kay nahulog sa lubi. Dunay mga tambal nga wala gayud sa tulo ka botika.
Gikan sa Cebu City Medical Center naglakaw ra tawon ang babaye pag-adto sa Dominique Pharmacy apan nabawo lang kay dili kompleto ang nakuha niya nga tambal.
Kakuyapon na kuno siya's kagutom kay wa g’yuy bisan usa ka sentimo. Duna pa man ko’y subra, gihatagan intawon nako’g gamay.
Awhagon nako ang mga opisyal sa City Hall nga tan-awa ninyo kining paagi sa Dominique Pharmacy kay mo-release sila’g tambal gikan ra sa alas dos ngadto sa alas singko sa hapon.
Aw ako gani, wala man unta hatagi bisan wala pa’y alas singko. Napugos lang sila’g hatag kay nasuko na ko, apan usa ra ka item ang nahatag, pastilan tawon kalooy nga pagka botika.
Padayonon nato ni’g hisgot ugma.