Milagro sa PCOS
Dili ko kabasol sa Bando Osmeña Pundok Kauswagan nganong wala nila madawat ang kapildihan ni Kongresista Tomas Osmeña batok ni Mayor Mike Rama.
Di mabasol ang liderato sa BOPK nganong inay dawaton ang resulta sa piniliay tinguhaon niini ang pagpasaka og protesta didto sa Commission on Elections.
Dunay igong sukaranan ang pagduda sa kampo ni Osmeña nga may milagro nga nahitabo sa PCOS machine hinungdan sa iyang kapildihan.
Lisod dawaton nga mayoriya sa mga kandidato pagkakonsehal sa BOPK midaog apan si Osmeña ug runningmate niini nga si Vice Mayor Joy Young napildi.
Gawas pa duna nay pruweba sa nangagi nga mga eleksyon nga di hingpit kasaligan ang PCOS machine pag-ihap sa boto diha sa mga balota.
Usa sa lig-on nga pamatuod sa di kasaligang resulta sa PCOS, labi pa og gamay ra ang labaw, mao ang resulta sa election protest ni kanhi Compostela Mayor Ritchie Wagas batok ni Joel Quinio niadtong 2010. Ang resulta sa manual count milabaw si Wagas nga gipildi ni Quinio basi sa resulta nga gihatag sa PCOS machine.
Nganong nahitabo man nga ingon niini? Sa ato pa di nato hingpit kasaligan ang resulta. Daghan ang posibling mga hinungdan. Una posible nga dunay depekto ang machine ug ikaduha posibling duna gyuy nahitabong manipulation.
Wala ko mamasangil nga gitikas ni Rama ang iyang kadaugan, apan mas makatabang aron pagsuta kun limpiyo ba ang iyang pagdaog ang posibling manual recount sa higayon nga tinud-on sa BOPK ang pagduso og protesta.
* * *
Unsa ka tinuod ang mga kasayuran nga mikatap nga dili bakasyon maoy tuyo ni Rama sa 22 ka adlaw niya nga pag-leave sa trabaho?
Misibaw man gud ang mga kasayuran nga nagpatambal ang mayor. Tinuod kaha nga duna siyay sakit nga gililong sa publiko?
Kun tinuod nga siya nibakasyon, nganong gisekreto ang dapit kun diin siya miadto aron sa pagbakasyon?
Nagpatambal man o tinuod nga nagbakasyon ang Mayor wala siya’y angay'ng itago sa publiko.
* * *
- Latest
