PCOS nakusahos

Ako nagtoo nga walay tikas ang gihimo ni bisan kinsa niadtong nilabay nga eleksiyon. Ang wala kapugngi mao ang vote buying.

Bisan kon adunay kakulian apan alang kanako ang automated election nga nagamit sa precinct count optical scan (PCOS) mas maayo kaayo itandi sa manual election.

Hinugay na niining mga protesta. Maghiusa na kita alang sa kaugmaran sa atong dapit.

Akong balikon, mobalik unta kita sa pagpamolitika karon na usab nga 2016.

* * *

Mga 11 ka adlaw na human sa eleksiyon apan daghan pang mga pildirong kandidato ang wala modawat sa ilang kapildihan.

Ang hapit tanang napildi nipasangil sa PCOS nga gimaniobra aron sa pagtikas kanila.

Mga lubasang pulitiko, kadaghanan kaatbang sa Liberal Party (LP), maoy nangreklamo.

Dinhi sa Cebu City, ang nireklamao mao ang napildi pagka-mayor nga si Kong. Tomas Osmeña, kandidato opisyal sa LP- batok kang incumbent  Mayor Mike Rama.

Kun duna pay gihimong tikas ang LP mapildi kaha si Kong. Tom? Ako nagtoo nga mayoriya sa katawhan, labi na ang mga batan-on, buot na gayud og kausaban. Dinhi sa Sugbo nangaparut sila si Osmeña, Kong. Eddie Gullas, mga Garcia, Espinosa ug Loot. Napildi usab ang mga Fua sa Siquijor.

Sa Mindanao, duha lang sa 16 ka mga Jalosjos nga nikandidato ang nidaug.

Sa Luzon, giharos og kapildi ang pamilyang Gordon sa Olongapo. Gipildi usab ni kanhi presidente Joseph "Erap" Estrada si incumbent Mayor Fred Lim. Daghan pa kaayong ilhadong political families ang nasikwati niadtong Mayo 13.

Kay sa eleksiyon dinhi sa Pilipinas wa man gyuy mapildi ang gipasanginlan mao ang tikas kuno sa PCOS.

Gibatikos intawon ang PCOS. Kun dili pa ni makina hagbay ra ning nakusahos.

* * *

Nasayud ko niadtong survey sa taga-Manila nga gihimo dinhi sa Cebu City nga ang resulta pabor sa kandidatora ni Rama. Pabor man gani usab kang Rama ang survey nga gihimo, suma pa, sa ig-agaw ni Kong. Tom.

Ang resulta, samtang hamugaway kaayo ang kadaugan ni Mayor Mike Rama apiki ang labaw ni Konsehal Edgar Labella sa pagka-bise mayor.

Gituhuan nga tungod kini sa name-recall. Sa mga balita sa radyo, telebisyon ug pamantalaan si Labella tawgon pa man gud og konsehal samtang bise mayor na si Young.

Dugay na sab kaayong namugaspugas si Young sa mga botante sukad pa sa iyang pagka-representante sa Promdi partylist. Wa usab gayuy salapi si Labella. Iyang puhunan mao ra gayud ang iyang kabatid sa pamalaud ug kaligdong.

Dili angayang tuhuan ang survey lamang nila ni Osmeña kay anaa man usay mga survey nga nagpakita sa kadaugan ni Rama ug Labella. Karon nasayud na kita kun kang kinsang survey ang tinuod.

* * *

Panahon na nga mag-andam ang mga politiko sa ilang mga kandidato alang sa piniliay sa barangay karong Oktubre.

Ako nagtoo nga ang Team Rama ug ang Bando Osmeña - Pundok Kauswagan (BOPK) mobutang na usab sa ilang mga alipures nga padaganon sa maong eleksiyon .

Nagpaabot ako nga init ang away sa Barangay Kasambagan diin konsehal si Franklin Ong nga kanunay makabangga ni Mayor Rama.

Ang bugtong opisyal sa maong barangay nga nagpaluyo sa Team Rama mao si Konsehal George Chang.

Gipaabot nga siya maoy kandidato ni Rama batok kang Barangay Kapitan Jun Lim ug dili ba ni Konsehal Ong.

Si Chang gipaabot nga suportahan ni kanhi Cebu City Councilor Aven Piramide. Gituhuan usab nga daghang barangay konsehal ang motapon ngadto sa iyang grupo.

* * *

Email: [email protected]