Ayaw mo panumpa

Idayon gayod nila ni kongresista Tomas Osmeña ug Joy Young ang ilang election protest batok kang re-elected Mayor Mike Rama ug Vice Mayor-elect Edgardo Labella tungod sa pasangil nga gitikas, gimanipola ug dili katoohan ang resulta sa piniliay.

Tungod kay namasangil silang gitikas, gimanipola ug dili katoohan ang resulta sa piniliay kinahanglan nga ang mga sakop sa BOPK nga midaug sa miaging piniliay dili papanumpaon ug dili palingkoron sa ilang katungdanan karong Hunyo 30 ug Hulyo 1 ning tuiga.

Kun mitoo si kongresista Tomas Osmeña ug Joy Young nga gitikas ug gimanipola ang piniliay kinahanglang awhagon nila ang ilang mga sakop nga midaug sa dili pagpanumpa ug dili paglingkod sa ilang katungdanan. Mao ni ang akong hagit nila.

Kun ugaling manumpa sila ug molingkod sa ilang katungdanan nagpasabot lamang kini nga ila lang gipaganahan, giatik-atikan ug giulo-ulohan si kongresista Tomas Osmeña ug Joy Young.

Kun ugaling manumpa ug molingkod sila sa ilang katungdanan nagpasabot lamang kini nga sila mismo wala motoo sa ilang pasangil nga gitikas, gimanipola ug kadudahan ang resulta sa miaging piniliay.

Sa migawas nga resulta sa piniliay mayoriya sa mga sakop sa BOPK ang midaug pero pildiro ang ilang mayor ug bise mayor. Mao ni ang rason nganong ilang giingon nga gimanipola ang resulta sa eleksyon.  Pero sa laing bahin, sa ilang kapildihan wala upod kaha makapangutana sa ilang kaugalingon sila si kongresista Tomas Osmeña ug Joy Young wala ba sila i-abandonar sa ilang mga konsehal pag-abot nila sa lawod sa piniliay?

Dili usab kaha kini ang hinungdan sa ilang kapildihan?