Gitikas ang piniliay

Giisa ni Congressman-elect Raul Del Mar ang iyang kinumong kamot dungan sa pagsinggit nga ipapriso ang mga nanikas sa piniliay. Kadudahan ang resulta sa piniliay, mao usab kini ang siyagit ni Congressman-elect Bebot Abellanosa.

Makabungog usab ang tubag nga YES sa mga dumadapig sa Bando Osmeña Pundok Kauswagan nga nagtapok sa dihang gipangutana sila sa kongresista kun ila bang iprotesta ang resulta sa piniliay.

Gitikas ang piniliay, ingon si Del Mar, kadudahan ang resulta sa piniliay, ingon si Abellanosa. Silang duha nga misiyagit ug misinggit nga gitikas ug kadudahan ang resulta sa piniliay pulos nakadaug pagka kongresista sa dakbayan sa Sugbo. Unsay buot ipasabot niini, nga silang duha si Del Mar ug Abellanosa dili makatoo ug nagduda sa ilang kadaugan sa miaging piniliay?

Kun may tikas sa miaging piniliay, si kinsa ang nanikas ug unsa nga matang sa pagpanikas? Kun ang PCOS machine ang nanikas, buot bang ipasabot ni Raul Del Mar ug Bebot Abellanosa nga nanikas usab sila sa ilang kadaugan?

Kun moingon silang wala sila manikas, buot bang ipasabot sa duha ka mga midaug pagka kongresista sa dakbayan sa Sugbo nga namili ang makina nga miihap sa boto sa mga tawo kun si kinsang kandidatoha ang ilang tikason?

Seguro tungod sa ilang simpatiya ngadto sa ilang amo nga pildero wala na makaalinggat ang duha nga ang nanggawas sa ilang mga baba nisumpaki na sa lohika, nga hasta ang ilang kadaugan ila nang gidudahan.

Kun maghisgot ta og pagpanikas sa piniliay, kinsa man ang adunay kapasidad sa paghimo niini, dili ba ang BOPK man? Kun maghisgot ta og pagmanipula sa piniliay, si kinsa man ang adunay kapasidad niini, dili ba ang BOPK man? Dili ba pinangga man ni Pinoy si Tomas kay ni Mike. Dili ba si Tomas man ang gipili ni Pinoy kay ni Mike nga maoy modala sa partidong Liberal dinhi sa Sugbo? Motugot kaha si Pinoy nga matikasan ang iyang piniling alaga sa dakbayan sa Sugbo?

Nganong dili na man lang dawaton ni kongresista Tomas Osmeña ang kamatuoran nga gipatiran na siya sa katawhan sa dakbayan? Tungod ba kay kini sakit ug siya nasakitan? Sakit diay ning patiran ta?

Kun unsa ka sakit ang gibati karon sa kongresista human siya maigo sa patid sa unom ka libo kapin ka mga tawong wala mobotar niya ingon ana usab kasakit ang gibati sa mga mamaligyaay og barbecue ug mga rebolto sa Basilica del Santo Niño nga nakatilaw sa iyang patid ug pag-insulto. Busa karon, PATAS na mo Congressman.