Mas mahinungdanon nga samtang sayo pa, atubangon na gyud ang maong mga problema aron dili kini modako o mograbe ba hinuon. Dili kini angay ikaulaw. Hinunoa, mahinungdanon kaayo kini aron maluwas sa hingtungdan ang iyang kaugalingon ingon man ang mga tawo nga nalambigit kaniya kuyog na niini ang iyang pamilya.
Pulo ka mga paagi nga ang ilimnong makahubog makadaut sa lawas sa tawo (matud ni Andrew Cate)
1. MAKATAMBOK KINI
Ang ilimnong makahubog usa ka depressant ngadto sa central nervous system nga makapahinay sa metabolic rate. Dugang pa, taas kini og calories. Kun hinay ang pagsunog sa mga calories diha sa lawas sa tawo, nan, mapundo kini sa lawas sa tawo.
2. KUYOG SA MGA PAGKAONG DILI MAAYO
Dugang pa, diha sa pag-inom og mga ilimnong makahubog anaa ang dakong hulhog sa pagkaon usab og mga pagkaon nga dili maayo ug makatambok sama pananglit sa mga barbecue, junk foods ug mga mantikaong pagkaon nga maoy hinungdan sa dili luwas nga katambok.
3. ANAA ANG POSIBILIDAD NGA IKAW MAKAPASAKIT SA IMONG KAUGALINGON UG SA UBAN
Maapektohan ang gahom sa paghimo og hukom nga tungod niini ang hingtungdan maoy posibleng sukaranan sa kadaut sa mga dili maayong panghitabo sama sa mga aksidente sa kadalanan, kamapintason, pangulata, pag-among among, panglugos, paghunos sa kinabuhi sa uban o sa kaugalingon ba kaha hinuon. -- Sumpayan pa