Napukan ang dinastiya sa mga Garcia sa lalawigan sa Sugbo. Hinoon dili pa gayod sa hingpit tungod kay anaa pa man si Governor Gwendolyn Garcia nga nakakapiyot pa sa pagka kongresista sa ikatulong distrito sa lalawigan sa Sugbo.
Ang pagkapukan sa mga Garcia mapasangil ba nato kini sa mga isyu sama sa korapsyon ug uban pa nga gikalambigitan sa gobernadora? Seguro dili, kay kun ang isyu pa sa korapsyon ang hinungdan, nganong nag-una man gihapon ang gobernadora sa iyang pagpapili sa pagka kongresista sa ikatulong distrito sa lalawigan sa Sugbo hulip sa iyang igsoon nga si Pablo John Garcia. Hinoon wala pa gayod siya maproklamar nga mananaug pero sa nahabiling mga balota nga iphonon murag siya gayod ang molusot.
Labing dili usab ang isyu sa korapsyon ang nakapildi sa mga Garcia tungod kay nganong napildi man si Noy Pabling ug Pablo John nga wala man sila malambigit sa isyu sa korapsyon? May misuway man tuod sa pagpasangil ni Pablo John og korapsyon pero mas labaw man nga dili katuohan ang mipasangil kay sa iyang pasangil.
Ako nagtoo nga gipul-an na lang ang mga tawo sa lalawigan sa Sugbo sa mga Garcia maong nakahukom na sila sa pagpili og laing pangalan sa politika. Ingon ani ka gamhanan ang katawhan kun mogamit na sa ilang gahom, walay si kinsang gamhanan nga makababag.
Ako nagtoo nga nakontento ang katawhan sa lalawigan sa Sugbo sa pagpangalagad sa mga Garcia pero bisan pa man niini, ila gihapon silang gihulipan tungod kay gusto na sila og bag-ong dagway sa mga moalagad kanila.
Ako nagtoo nga ang isyu sa dinastiya sa politika sa mga Garcia ang nakapadulot nila. Ang katawhan nakasabot na kun unsay political dynasty. Ug kay sila mang katawhan sa lalawigan sa Sugbo ang nagtugot nga makatukod og dinastiya sa politika ang mga Garcia maong sila ra usab ang mikuha ug mipukan niini. Ang katawhan sa lalawigan nakaamgo na nga dili diay maayo ang ilang gihimong eksperimento busa sila ra usab ang miboluntaryo sa pagbungkag ug pagpukan niini.