Dyutay na lang ang wa maedukar sa pagboto

Ang  kadasig  sa katawhan  pagkasar  sa ilang  boto  kagahapon  timailhan  nga   naedukar  na  sa  hingpit  ang  mayoridad  sa  mga  Filipino  bahin  sa kabililhon  sa  pagbotar.

Kini  nakita  sa kakusog  sa bul-og  sa katawhan  gikan  sa pagbukas  sa tagsatagsa  ka  presintong  botohanan  hangtud   sa hapit  na  masawop  ang  adlaw  dayon    sa pagtak-op  sa   mga  lawak  botohanan.

Mahimong  may  pipila  pa  ka  mga  botante  nga  wala  na makabotar  tungod  sa  kapiit  sa  oras   sa trabaho   nga way  lugar  sa buntag  ug  wa  usay  lugar  sa hapon, pun-an  sa pagpabaya  ug  kakuwang  sa  kakugi  pagkasar  sa iyang  boto, aw   miresulta  sa   pagtapol   ug  gituyo  gyud  nga  wa  mobotar.

Ang  mga  botante  nga  ingon  niini  nagkinahanglan  og  anak nga  patumbon  sa  eskuylahan  ug  pakab-oton  og  taas  nga ang-ang  sa edukasyon  aron  makatambag  sa  maong  matang  sa amahan.

Kay  ang  mga  hamtong  o  kaha  husto  na  og  kabuot , lisud  nimo  pasundon  og balaud  kun kuwang  siya  sa respeto  sa  iyang  mga  higala  o  kaha  ubang  tawo  nga  paryente  ug  di paryente.

Ilabi  na  kun  sa iyang  pagtan-aw  sa iyang  kaugalingon  mas  hawod  siya  kay  sa uban  busa  di  na  siya  maminaw  sa  hunahuna  sa iyang  isigkaingon.

Hinuon  pipila  na lang  ang  ingon  niining matang  sa Filipino, kauban  ra usab kini  sa pipila  nga  wa mobotar  kay  way  mitunol  kanila  og  kuwarta  ug  ang  ingon  niini  nagkinahanglan  og anak  nga  edukado  aron  mopasabot  kanila  sa kamahinungdanon  sa pagboto, apan  kun way  anak, aw  mamatay  kini  nga  wa makasabot  unsa  ang  iyang  pagka Filipino.(Wen Celen)