Alang sa mga palahubog

Pasiuna

Usa ka higayon niana, dunay parokyano nga suod na pud nako nga tungod niini mura na lang pud nako ni siya og usa ka nanay. Niingon siya kanako: “Padre, tambagi gud kuno na palihug si tatay nimo nga moundang na og hubog-hubog!” Daw sa natuk-an ko sa hangyo ni nanay kay dunay mga higayon ra ba usab nga ako mismo ang mopalit og ilimnon kang tatay kay mag-inom man sab mi usahay.

Apan seryoso akong namalandong sa maong awhag ug tungod niini nihimo ako og ginagmay nga pagduki-duki kalabot sa isyu sa alcoholism ug alcohol abuse. Kay alang kanako, mas angayan nga ato kining tun-an sa pamasin nga makahatag kita og konkretong mga tambag kanila nga nakasinati sa maong mga problema. Kini tungod kay bisan kun moinom ka, wala kini magpasabot nga palahubog ka na. O basin baya og nagpunay na kita og inom nga tungod niini nahimo kitang adik sa bino o alak apan nagdumili kitang moabli sa atong kaugalingon alang sa bisan unsang tabang aron mamahimo kitang gawasnon sa maong kahimtang? Kahinumdoman nga niadtong nag-regency pa ko human sa akong pagtungha sa college seminary, daw nahimong kabahin sa akong routine kaniadto ang pag-inom. Gikan sa alas siyete sa gabii hangtud na gani sa sayong kabuntagon. Salamat sa Ginoo nga naundang nako kadto. Hinuon, gikapoy na pud ko’g inom taman sa ginhawa. Kay lagi ang bisan unsang sobra ang wala’y maayong linugdangan. Ang tumong ning atong lindog karong mga panahona mao ang:

1. Paghatag og mga mahinungdanong kasayuran alang sa mga manginomay ug sa mga nahimong palahubog kun unsa ang mga kadaut nga mapupo sa naghinobrang pag-inom.

2. Pagdasig diha sa pagpuyo sa kinabuhi sa balanse ug sa moderation. Dili dautan ang pag-inom apan ibutang lang gyud sa lugar.

3. Paghatag og paglaum nga ang si bisan kinsang nagumon ning maong bisyo ang dunay kahigayonan pa gyud nga magbag-o sa kaugalingon kana, kun manggihatagon lang gyud nga mopaambit sa kaugalingon. Maud pa nila: “The Greatest Room is the Room for Improvement.”