Gikahinaman nga adlaw sa paghukom

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini. Ang Mayo 13, 2013 election maoy adlaw nga gikahinaman sa tanang kandidato sanglit makita na man dinhi ang gidaghanon sa mga tawo nga nagsuporta sa ilang kandidatura nga kun makita sa pag-iniphanay nga labing daghan mao usab kini ang makaangkon sa gipangandoy nga kadaugan.

Nunot niining nagkaduol na nga mga adlaw sa piniliay  kun dili  man gani mahimutang ang mga tawo nga nagpaabot lang sa mogawas nga resulta sa iniphanay labaw pa gayod nga dili mahimutang ang mga kandidato kay mahinamon man kini nga masayod sa gidaghanon sa mga tawo nga nagsuporta sa iyang kandidatura.

Adunay  nag-ingon nga ang matag botante kinahanglan gayod nga sa dili pa moadto sa mga presinto alang sa ilang pagbotar sa maong adlaw maoy labing gikinahanglan nga mahashasan daan ang kandidato nga iyang botohan.

Nag-una nga pagabasehan mao ang pagtan-aw sa kinaiya sa kandidato nga sinsiro gayod nga motuman sa kaakohan nga gisangon sa katawhan o  makasugakod ba kini pagpangalagad nga walay bikil ang  panglawas nga gihambin.

Dugang pagabasehan sa mga tawo sa ilang pagpakanaug og hukom alang sa pagpili og kandidato mao pagtan-aw daan sa ilang binuhatan sa pribado man o anaa na daan sa goberno.

Matud pa nila nga ang kandidato nga naggikan pa sa pribado  maoy makita nga bisan kun sibilyan apan aktibo na daan sa katilingbanong kalihokan sukwahi usab kadtong kandidato nga naglingkod sa katungdanan nga bugtong nahimo mao lamang ang pagpaburot sa iyang kaugalingon.