Sa panahon sa kutas nga kampanya sa atong mga kandidato maoy atong mabati gikan kanila ang labong kaayong mga estorya nga makapadasig kaayo natong mga kabus sanglit napuno man kini sa mga panumpa ug mga saad nga maoy basehan sa pagpakanaug sa hukom karong Mayo 13 nga maoy adlaw sa piniliay.
Ang kasagaran sa mga kandidato sa ilang pag-atubang sa kabus nga katawhan maoy gihangyo nga suportahan ang ilang kandidatura kay bugti sa maangkon niining kadaugan mao man ang tinud-anay ug sinsiro nga pagserbisyo sa katungdanan.
Ang kandidato nga sinsiro sa panirbisyo mahimong ilhon bisan sa pagpakabuhi niining pribado kay makita na man daan ang nahimo niining maayo bisan kun wala pa kini sa puwesto.
Ang katawhan nga nagpili kanila maayo kaayong maniid sa mga opisyal sa ilang kausaban sa kinaiya ug batasan sa wala pa maghupot sa katungdanan ug ilang itandi dihang naglingkod na kini sa iyang buhatan.
Ang pipila kanila sa panahon nga nagserbisyo sa katungdanan maoy ipakita ang iyang kakugi sa pagpatuman sa mga programa ug mga proyekto nga gipahaum sa panginahanglan sa mga tawo.
Ang pipila usab kanila maayo lang sa estorya sa panahon sa ilang kampanya apan dihang naglingkod na sa iyang buhatan maoy makita ang dakong kausaban sa kinaiya.
Ang katawhan walay mahimo kay naglingkod na man kini sa katungdanan igo na lamang sa pagbagulbol sanglit wala man mabuhat ang gisaad sa panahon sa paghangyo nga suportahan iyang kadidatura.