Hinaut pang dili gamiton sa pamolitika kining paglimpiyo sa city hall sa nasunog nga bahin sa Sitio Bato, Bgy. Ermita, Cebu City.
Buot ni Mayor Mike Rama nga himoon ang re-blocking ug himoan og dalan ang maong dapit. Iya hinoong gipasalig nga ang tanang nasunogan makatukod og balik sa ilang mga balay.
Apan ang pipila ka mga konsehal sa Bando Osmeña - Pundok Kauswagan (BOPK) ang buot mobabag sa katuyoan sa mayor nga malimpiyo sa maong dapit.
Ang usa ka dakong opisyal sa Department of Interior and Local Government (DILG) nga gipasud ni Kong. Tomas Osmeña mibabag usab sa katuyuan sa mayor.
Ambot ug nganong misupak man ang ubang mga molupyo, nga nagsul-ob og Type O, sa usa ka katuyuan nga makaayo unta kanila? Ah, politika!
* * *
Niadtong Abril 12, gidakop si Mario Alfie Ducayag kay nangawat kuno og tsinelas sa Gaisano Metro-Colon.
Gipusasan siya sa security camera operator sa maong department store nga si Jeffry Aquino. Siya usab ang gipasanginlang mikulata hangtud namatay si Ducayag.
Ang autopsy ni Dr. Nestor Sator sa PNP Regional Crime Laboratory nagpakita nga si Ducayag namatay sa asphyxia resulta sa pulmonary tuberculosis. Wa hinoon niya isalindot ang foul play nga hinungdan.
Ang banay ni Ducayag nihangyo sa National Bureau of Investigation (NBI) sa paghimo og re-autopsy. Buot usab nila nga ang NBI na ang modala sa maong kaso.
Sa laing autopsy sa patay nga lawas ni Ducayag nakit-an ni Dr. Rene Cam nga ang baga sa biktima "showed bruises and signs of congestion while his left lung collapsed." Morag nakig-away siya sa nagdakop kaniya kay dihay mga bun-og sa iyang palad, tuong bukton ug dughan, sumala ni Dr. Cam.
Apan ang City Intelligence Branch (CIB) sa Cebu City police midakop kang Aquino ug pasakaan na unta kini’g kasong murder didto sa piskaliya. Maayo gani kay didto ang inahan ug igsoon sa biktima sa maong dapit mao nga wala kini mahinayon pagpasaka.
Apan sa wa pa kini, nisaad ang kapolisan nga dili mopasaka’g kiha kang Aquino ug ni bisan kinsa nga nalambigit sa maong kaso. Walay word of honor ang PNP?
Si Aquino mitumbok sa ubang mga tawo nga maoy mikulata sa biktima maong gibuhian kini siya sa kapolisan.
Duna bay buot protihian ang PNP nga nagdalidali man sila pagpasaka’g kaso nga walay lig-ong ebidensiya?
* * *
Ania kining resulta sa survey sa Pulse Asia nga gihimo niadtong tunga-tunga sa Marso ug Abril, karong tuiga: 1) Legarda; 2) Escudero; 3) Poe; 4) Cayetano; 5) Villar; 6) Trillanes; 7) Aquino; 8) Estrada; 9) Binay; 10) Pimentel; 11) Angara; 12) Zubiri; 13) Honasan; 14) Enrile; 15) Hontiveros ug 16) Magsaysay.
* * *
Email: msr1144@yahoo.com