Daghan na ang maayong relasyon nga nagun-ob tungod sa politika. Dili magtingganay ang magsuon, ang ginikanan ug anak, ang managsilingan, ang managhigala, ang mag-agaw ug uban pang relasyon tungod kay managlahi ang baroganan, nagkasumpaki ang panud-ong kay lain-lain ang partido ug kandidato nga gilabanan.
Dili na bag-o kun atong masayran nga adunay mga paryente nga nagpinatyanay, adunay managhigala ug managsilingan nga nagkagubot. Nganong magpadala man gayod sa kainit sa politika? Nganong iangin man ang kinabuhi ug pagbinatiay tungod sa tagsa-tagsa ka prinsipyo sa bugnong lugaynon?
Dili unta angay kalimtan nga ang eleksiyon kausa ra, molabay dayon kini. Human makadaug ug mapilde ang usa ka kandidato, mahilom na usab ang kalangas sa politika. Kadiyot ra kining magpabilin sa hunahuna ug kasingkasing sa tawo.
Ang panagkaliwat, ang panaghigala ug ang panagsilingan kanunay ania sa atong kasingkasing ug panumdoman. Naglihok ang pagminahalay ug pagbinatiay sa atong kaugalingon. Apan gub-on lang nato kini tungod sa politika?
Pastilan no. Dili dayon magtinagdanay, magbungolay dayon ang mga tawo nga kaniadto nagminahalay ug nagrespetohay kay managlahi ang baroganan diha sa politika.
Karon nga hapit na ang eleksiyon, daghan na usab ang nagbinaharay, nagdumtanay ug naglagot sa usa’g-usa kay lain-lain ang mga kandidato nga gisuportahan.
Usa kini ka kinaiya nga angayan lang unta nga isalindot sa kaugalingon. Maoy ipatigbabaw ang pailob ug pagtahod sa usa’g-usa aron pagkahuman magpadayon ang maayong pagtinagdanay ug pagbinatiay sa usa’g-usa. Sa ingon niining pagpahimutang sa atong kinabuhi, dili makawang ang hustong mithi sa maayong pamatasan nga maoy atong gusto nga sundon sa atong mga anak ug mga apo.
Ang kainit sa politika maoy sulsol ug hulhog sa yawa nga gustong mogun-ob sa maayong relasyon sa matag usa. Sa dili pa magpadala sa tawo sa bul-og sa kahangol sa gahom sa usa ka kandidato, angay nga hunahunaon sa hustong pagsabot nga ang makapahimulos lamang sa kaayohan mao ang makadaog sa eleksiyon nga ang gilantaw ang kaugalingong interes.