Jackie Enrile naapiki

Ang Lay Initiatives for Election (LIFE) kansang mga sakop mao ang mga layko sa nagkalainlaing church-based organizations sa Archdiocese of Cebu mosuporta ug mokampanya sa 12 ka mga kandidato pagka-senador, walo pagka-kongresista ug tulo ka party-list groups. Wala hinoon silay giindosar nga kandidato sa lokal nga pangagamhanan.

 Sa dihang gi-interview sa tulumanon "Hello Cebu, Maayong Buntag Pinoy" uban kanamo ni Atty. Divine Marcial Flores, gipahibawo ni Chairperson Fe Barino nga ilang gisuportahan ang mga kandidato nga nisupak sa RH law ug mosupak sa ubang mga   balaudnon nga ilang gitawag nga "anti-life" sama sa divorce, same-sex marriage ug euthanasia.

Sumala niya nga ila usab nga ipakita nga aduna gayuy "Catholic vote."

* * *

Panahon sa eleksiyon mangguwa kining nagkalainlaing isyu batok sa mga kandidato.

Dinhi sa Sugbo, gawas sa mga kaso nga giatubang ni suspended Gob. Gwen Garcia kalabut sa Balili property ug ang imbestigasyon sa pagtukod sa Cebu International Convention Center (CICC), gipasakaan usab og kaso ngadto sa Ombudsman ang iyang igsoon, kandidato sa pagka-gobernador Kong. Pablo John "PJ" Garcia sa giingong unexplained wealth.

Sa Cebu City, ang kandidato sa pagka-kongresista sa south district, Konsehal Bebot Abellanosa giimbistigar na sa Ombudsman tungod sa gituhuang conflict of interest kalabut sa pagdawat sa iyang eskuwelahan og mga scholars bisan kun siya ang chairman sa scholarship committee sa konseho. Ang nangusog sa pagpasaka sa kiha mao ang iyang kaatbang nga si Atty. Totol Batuhan.

Aduna usay daghang mga kaso diin ang mga politiko dinhi sa Sugbo nagbawosbawos og pasakaay og kaso.

Unsa may hukom sa Ombudsman niining maong mga kaso?

* * *

Nagpaabot usab ako sa hukom sa Comelec sa mga kasong napasaka batok sa mga kandidatong nagpataka og papilit ug butang sa ilang campaign materials nga nahisupak sa ilang mga lagda.

* * *

Sa kauluhan, ang ubang mga kandidato sa pagka-senador nireklamo nga biktima sila sa black propaganda.

Si Kong. Jackie Enrile kulatado sa isyu nga pagpatay sa usa ka anak og dakung opisyal sa navy niadtong tuig 1975. Giangkon kini sa iyang bodyguard kinsa nakombikto sa maong salaud.

Apan bisan unsaon og pagpanghimakak ni Enrile niining maong pasangil naapiki siya niining maong isyu. Nahadlok ako nga mao kini mobitay kaniya sa umaabot nga piniliay.

Mikisikisi usab si Kong. JV Ejercito nga nagpapili pagka-senador sa taho nga aduna siyay investment didto sa British Virgin Islands nga wa niya ideklarar sa iyang statement of assets and liabilities (SAL-N).

Sa laing bahin, ang mga reelectionist senators Loren Legarda ug Antonio Trillanes IV nasuko tungod sa pasangil nga sila maoy nagpasiugda sa usa ka balaudnon nga magminus sa retirement benefits sa mga magtutudlo, mga sakop sa PNP ug AFP ug ubang mga retirees.

Atong mapaabot ang daghan pang mga tinaguan sa mga kandidato nga mayagyag samtang nagkaduol na ang eleksiyon.

* * *

Email: [email protected]