Hunonga na uy...

Angay tingali nga hunongon na sa mga kandidato ang paggamit sa pulong “tiguwang,” “giango-ango” ug uban pa nga paghulagway nila sa ilang mga kaatbang nga kandidato.

Nakadungog man gud ko nga si kanhi Kongresista Raul V. Del Mar gihulagway nga tiguwang ingon man giango-ango na kuno. Pastilan, imbis makakuha mo og botos kay mangampanya kamo, ang mga tawo moyamiid na hinoon.

Tambag nako kampanya lang mo nga dili mosulti og sakit nga pulong. Ibutyag sa publiko sa inyong pagpangampanya kun unsay inyo nga mga plano kun mapili kamo sa katungdanan.

Parte ni Del Mar daghan na kaayo siya og mga maayong serbisyo nga nahatag sa katawhan. Nasayran nako nga gawas ni Del Mar, duna pay walo ka laing mga nagtinguha nga mahimong kongresista sa north district.

Usa ra man hinoon ang nadunggan nako sa iyang pulong-pulong nga kusog kaayo mamalikas sa iyang pakigpulong. Resulta, ang mga tawo nangyamiid na hinoon kaniya.

Salawayon ba diay kun tiguwang? Tinuod 71-anyos na si Del Mar apan nganong si Senador Juan Ponce Enrile nga mas edad-edaran pa kay kang Del Mar apan nganong mas suheto pa man lagi sa balaud kay sa ubang senador?

Usbon nako, kampanya lang aron masayud ang katawhan kun unsa ang inyong maayong plano kun makombinsir ninyo ang katawhan nga kamo ang pilion nila atul sa adlaw sa eleksyon.

* * *

Sa akong paglakaw-lakaw sa lainlaing dapit, nasuta na nako kinsa ang posible nga modaug, ilabi na sa pagka konsehal sa dakbayan.

Dunay mga kandidato diha nga gianugnan ko sa ilang kahago ug kakapoy kay nasayud man g’yud ko nga dili sila makadaug. Maayo pa tingali nga matulog na lang mo kay duna pa’y maganansya.

Kun molansar gani kita, ayaw pagpalaban og laing mga tawo. Sa ato pa dili diay mo makadaug kun wala ang tawo nga mopaluyo kaninyo?

* * *

Saludo ko kay gipahimoan gayud sa Barangay Lahug pinaagi ni Councilwoman Maryann de los Santos ug Mayor Michael Rama og bag-ong merkado ang mga tindera nga nag-ukopar kaniadto daplin sa karsada sa gitawag og “JY wet market.”

Tingali pipila ka adlaw gikan karon mapalapdan na ang karsada nga paingon sa Sitio Son-oc sakop sa Barangay Lahug nga anaa mag-agi kilid sa Aderan Hotel.

Angay nga papahawaon ang mga tawo nga anaa nag-ukopar sa aseras diha sa maong karsada. Atensyon Ma’am Raquel Arce, hepe sa PROBE, may tahas na kanimo gikan sa mayor nga limpyohan ang maong dapit.