Nailad sa pagpalit og sakyanan nga wa diay prangkisa

 Importante kaayo nga kun ikaw mopalit og sakyanan tan-awon gyud kun tinuod ba kining rehistrado sa LTO ug kun kini usa ka Public Utility Vehicle mas maayo nga imong susihon daan sa LTFRB kun tinuod ba kining adunay prangkisa. Kini tungod sa kadaghang palusot karong panahona sama sa mga fake nga mga registration ug fake nga mga prangkisa ilabi kun smuggled car ang imong napalit. Unsa bay imong buhaton kun ikaw makapalit og taxi nga peke ang iyang prangkisa? Kana nga pangutana ang akong tubagon karon sa atong column.

Dear Atty. Divine,

Aduna koy napalit nga taxi  ug ang akong giapas sa pagpalit sa taxi  mao ang iyang prangkisa. Karon sa dihang akong gisusi sa LTFRB akong nasuta nga wa mag-exist ang prangkisa sa maong sakyanan, sa ato pa, peke ang maong prangkisa ug tungod niini wa nako magamit sa pagpamasahero ang maong taxi.  Unsa may maayo nako nga buhaton ani attorney nga klaro man kaayo nga nangilad kanako ang maong seller. Ang ako lang gusto attorney nga akong makuha pagbalik ang kwarta nga akong gibayad sa seller, unsa may maayo nako nga buhaton? — Tony”

* * *

Dear Tony,

Kun wa kay plano nga mopasaka og criminal case nga estafa batok sa seller tungod sa iyang pag-ilad kanimo, ang maayo nimong buhaton karon mao ang pagpadala og demand letter ngadto sa seller alang sa imong tinguha nga pagpa refund kaniya. Mamahimo sab ka nga modangop sa Public Attorney’s Office kon PAO sa inyong lugar kay ang Public Attorney nga motabang kanimo mamahimo man nga makapatawag og conference uban sa seller aron pag-areglo sa inyong problema. Lain nimong option sa pag-claim sa imong refund mao ang pagpasaka og small claim case ubos sa A.M. 08-8-7-SC (Rules of Procedure for Small Claims Cases) kun wa mosubra sa P100,000 ang imong ipa-refund kaniya. Mas dali ang proseso niini tungod kay ang Korte motakda dayon sa hearing ug usa ra ka postponement ang gitugot kun kini adunay balido nga rason. Di na sab ka magkinahanglan og abogado sa small claim cases kay ang Petition o  Pleading alang niini andam na daan sa Office of the Clerk of Court ug igo na lang ka nga mo-fill-up ug mopirma niini. Ang Korte diha-diha makapakanaug og desisyon dayon human sa hearing basi sa ebidensya ug ang maong desisyon final na ug dili na mamahimong iapila basi sa Sections 17, 19 ug 23  sa Administrative Memorandum No. 08-0-7-SC. Hinaut nga akong natubag ang imong pangutana.— Atty. Divine

Kun aduna moy pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.