Mga polis aksyoni

Maayo kay gipakunhoran og P1.65 ang presyo sa matag litro sa gasolina apan nalantawan usab nako nga pipila ka adlaw gikan karon pasakaan na usab kini pagbalik nga ang resulta mao ra gihapon.

* * *

Kaniadto, may kaila ko nga nagtrabaho sa City Hall. Igo lang mo-time-in apan mopauli sa ilang balay. Wala magdugay nasakpan ug nataktak sa trabaho.

Dili kini imposible nga duna pay ubang mga kawani sa City Hall nga naghimo niini. May nadawat ko nga report kabahin sa binuang sa usa ka kawani sa City Hall. Naa gud ko sa City Hall kanunay

* * *

Dunay mga polis nga “nag-moonlighting” sa usa ka pribadong kompaniya dinhi sa Sugbo, upat g’yud ni sila kabuok. Duna ko’y mga ngalan niining upat ka polis.

Pagka swerte aning maong mga polis. Paminaw nako basin apil ang ilang commander kay siyaro og wala siya masayod. Ako usa kini nga ipasusi sa mga higala ko sa Police Regional Office-7.

* * *

Ang mga polis sa Toledo gisaway sa mga tawo didto kay gihulagway nila nga wala g’yuy gihimo sa problema sa illegal nga drugas, ilabi na diha sa gitawag og “Boulevard.” Kinsa man kini si Boyboy nga giingon nga usa sa nalambigit sa drugas?

Unya, daghan kuno nga mga drayber sa bus nga nagbiyahe sa Toledo suki niining maong mga pushers diha. Atensyon sir Henry Biñas, palihug aksyoni ni sir.

          Duna ‘say mireklamo sa kapitan sa Pung-ol-Sibugay kay kanunay kuno nga gamiton ang isyu nga sakyanan sa City Hall sa personal. Sa una adunay mitug-an kanako nga gitaptapan ang plate numbers sa sakyanan sa City Hall nga giisyu sa kapitan sa Pung-ol Sibugay aron nga dili dayon mailhan.

* * *

Mga polis sa Consolacion, aksyoni palihug ninyo kining grabe nga pagpamaligya’g shabu diha sa Marian Village sa Tayud. May mikontak nako ug mihatag pa sa mga plate numbers sa sakyanan aning mga tawo nga namaligya’g drugas.

Sa Toledo, ambot nasayod ba kaha ang kapolisan niining usa ka sakop sa BJMP nga nagpasugal diha sa iyang balay. May mireklamo na kay daghan na ang nakat-on sa mga bata.

May polis unta nga silingan sa BJMP apan matud pa wala kabadlong.

* * *

Uy, manan-aw diay unya kita sa Horse Riding Competition diha sa SRP-Cebu City karong Abril 26 ngadto sa 28.

Matud ni City Veterinarian Alice Utlang ug ni Anton Quisumbing nga presidente sa Philippine Horsemen Federation nga malingaw g’yud kaayo ta kay dunay lainlain nga kategoriya.