Family affair sa senado

Sa usa ka demokrasya nga nasud sama sa Pilipinas, ang tanang mga lumulupyo nga nahisakop niini nga anaa sa hustong edad adunay kagawasan sa paglansar o pag-apil sa bugnong lugaynon. Aduna gani uban nga bisag walay kuwarta nga magamit sa kampanya mosalmot sa eleksiyon tungod niining maong sistema.

Ug kay wala may lig-ong balaod nga nagdili dinhi sa nasud sa political dynasty maong dili kapugngan ang dagkong pamilya ug kuwartahan nga magkupot og posisyon sa gobyerno. Sama sa umaabot nga eleksiyon sa Mayo, gipahimuslan sa mga inila ug bahandianong pamilya ang pagsalmot aron makakupot og gahom sa kagamhanan.

Sa mga kandidato sa pagka senador, anaa si Jack Enrile, JV Ejercito, Allan Cayetano, Bam Aquino, Tingting Cojuangco, Cynthia Villar ug Nancy Binay.

Kining maong mga kandidato nga nagpapili kun makadaog sa umaabot nga eleksiyon, matawag nga usa ka family affair ang mahitabo sa senado. Naglingkod pa karon sa senado ang igsoon ni JV Ejercito nga si Jinggoy Estrada. Usa ka senadora karon si  Pia Cayetano nga igsoon ni Allan Cayetano. Wala pa mapupos ang termino   ni Manny Villar isip senador nga bana ni Cynthia Villar. Ug maoy Senate President si Juan Ponce Enrile nga amahan ni Jack Enrile. Si Bam Aquino ug Tingting Cojuangco pulos kaliwat ni Presidente Noynoy Aquino. Unya, si Nancy Binay anak sa karong bise presidente sa nasud nga si Jojo Binay.

Di ba matawag man nga family affair unya sa senado kun ang gihisgotang mga kandidato sa pagka senador makadaog sa May election? Hinuon, kining tanan depende ra gayod sa resulta unya sa eleksiyon.

Labaw na gayod nga makaingon kita nga depende kini sa mga botante kun ila bang botaran kining maong mga kandidato. Kun mahitabo nga makadaog sila, ang pagsanta sa political dynasy dinhi sa atong nasud magpabilin na lamang nga usa ka damgo. Onli in da Pilipins.