Taga tribu naigo sa politika

Mihukom ang taga Tribu Lumad Basakanon sa dili na lamang pagsalmot sa Aliwan Festival nga pagahimuon karong Abril 11-13 ning tuiga didto sa kaulohan. Ang hukom sa dili pagsalmot sa Aliwan Festival naumol human gibasura sa konseho sa dakbayan sa Sugbo ang gipangayo sa  Tribu Lumad Basakanon nga tabang financial nga nagkantidad og tulo ka milyon ka pesos nga gisugyot nga pagakuhaon sa Philippine Amusement and Gaming Corporation nga pundo.

 Apan ang pangulo sa Committee on Budget and Finance sa konseho sa dakbayan sa Sugbo nga si Margot Osmeña wala mouyon sa gisugyot nga pagakuhaan sa tabang financial tungod kay ang kalihokan kultural. Si Konsehal Margot Osmeña nagkanayon nga sigun sa gisita sa Philippine Amusement and Gaming Corporation nga patakaran wala itugot ang paggasto sa ilang pundo alang sa mga kalihokang kultural tungod kay alang lamang kini sa mga programang pang economic livelihood, disease prevention, emergency assistance, inprastraktura, ug ingon man sa pagpalambo  sa kahapsay ug kalinaw sa dakbayan.

Tungod sa nahimong hukom sa Tribu Lumad Basakanon, ang dakbayan sa Sugbo nawagtangan og representasyon sa prestihiyosong festival niining tuiga didto sa kaulohan.

Kun imong tugkaron, politika ang hinungdan nganong wala hatagi og pundo sa konseho sa dakbayan sa Sugbo ang taga Tribu Lumad Basakanon. Ang taga Tribu gipangulohan kini ni kapitan George Rama nga kadugo ug kaalyado ni Mayor Mike Rama nga kaatbang sa politika sa bana ni Margot nga si kongresista Tomas Osmeña.

Kun imong tan-awon sa atubangan makita tinuoray nimo nga adunay rason ang komitiba ni Konsehal Margot Osmeña sa wala pag-uyon sa gipangayong pundo nga pagakuhaon sa salapi sa Philippine Amusement and Gaming Corporation, pero kun imong bukiki-on mobantang ang tinuoray nga hinungdan sa tanan, ang politika.

Kun gusto gayod sa komitiba ni konsehal Margot Osmeña nga makasalmot sa Aliwan Festival ang mga taga Tribu Lumad Basakanon sayon ra gyod kaayo nila ang paggahin og pundo alang niini tungod kay poyde man silang makasugyot kun asa mokuha og pundo. Poyde man gani nila ang pagpagamit gayod sa pundo sa Philippine Amusement and Gaming Corporation para sa Aliwan festival ug kini mahimo nila pinaagi lamang sa pag-justify. Ako nasayod nga kaya  kaayo nila kini kay kining atong mga konsehal dili man ni mahutdan og rason, kanunay man ni silang may rason sa mga butang nga ilang gusto ug dili gusto.             

Kaluoy sa mga taga Tribu Lumad Basakanon naigo sa bala sa politika.