Walay lugar sa mga mugbo
Nahanaw ang paglaum sa mga putot o mugbong tawo nga mahimong pulis, bombero ug jailguard. Kini sa dihang gi-veto ni Presidente Benigno Aquino ang bill nga nagdili na sa height requirement alang sa mga aplikante.
Matud pa ni Aquino nga kinahanglanon gayud ang height requirement niadtong gusto mag pulis, bombero ug jailguard tungod sa nature sa ilang trabaho nga adunay kalambigitan sa pagpatunhay sa peace and order.
Apan daghan ang wala makagusto sa pag-veto sa presidente sa maong bill. Grabe ka disappointed kuno si Cebu third district Representative Pablo John Garcia. Basi sa research, miingon si Garcia, nga wala gyuy koneksiyon ang height sa performance sa usa ka pulis, bombero ug jailguard.
Bisan si Senator Gregorio Honasan, kinsa dakong supporter sa maong bill sa Senado, wala makaayon sa pag-veto sa presidente. Maningkamot kuno ang senador nga makahakot og dakong suporta sa Senado ug House of Representatives inig convene pag-usab sa Kongreso sa iyang lakang nga ma-override ang veto sa presidente.
Kinahanglanon ba gyud ang taas nga height alang niadtong gusto magpulis, bombero ug jailguard? Siguro daghan ang moingon nga kinahanglanon gayud kini. Apan adunay sektor ang pabor sa pagwagtang sa height requirement aron usab mahatagan og tsansa kadtong mga mugbong tawo.
Apan insakto lamang ang gibuhat sa presidente sa pag-veto sa maong bill. Klaro nga mas dako ang advantage sa usa ka pulis o jailguard kun taas kini tungod sa nature sa ilang trabaho.
Sa ilang pagpatrolya sa kadalanan, mas katahaan ug makakuha’g respeto gayud kadtong mga tag-as nga pulis. Kini tungod kay siguradong magpanagana gayud ang mga kriminal.
Bitaw. Aron pagpreserbar sa integridad sa propesyon sa law enforcement, insakto lamang nga katahaan usab ang atong mga pulis, bombero ug jailguard. Kinahanglan nga respetohan ug presentable gayud sila sa mga mata sa publiko.
Kinsa na man unyay morespeto kun ang atong tigbantay sa kahusay ug kalinaw mga mugbo nga walay ikabuga batok niadtong mga bugok sa katilingban?
- Latest
