Pagbantay: Organ syndicate ania na sab

May mga manuroy sa kadalanan, tindahan o kabalayan nga magpasumangil sa pagpamaligya’g mga pahumot (perfume). Dasigon nila ang mga bata, batan-on babaye o lalaki pinaagi sa pag-ingon nga puwede ra kini datadatahan kun wala’y ikabayad dihadiha. Unya hagdon nila ang gikaatubang nga tin-edyer sa pagsulay pagsimhot sa mga binotelyang pahumot. Diay, ang baho nga gikan sa maong perfume nga gitunol, adunay kemikal nga makapatulog.

Dinhi, pahimuslan dayon sa nagpakaaron-ingnong promo sa pahumot ang higayon: Himulbulan nila sa tanang valuables: gikan sa pitaka, bag ngadto sa mga mahalong alahas ang mabiktima sa ilang modus. Unya ila pa gyud kining kidnapon aron kuhaan sa bisan unsang organ sa lawas, diin ibaligya nila sa mahal nga presyo ngadto sa ilang suking mamalitay.

Organ syndicate ang ngalan sa maong grupo. Ania nay pipila kanila nga naghinayhinay nag operate sa Pilipinas, diin sagad sa ilang target: mga bata, tin-edyer o batan-on (lalaki man o babaye).

Gipahimangnoan ang tanan, labi na kadtong mahilig sa mga pahumot nga dili gyud mo-entertain sa mga walk-by o roving nga mamaligyaay’g pampaguwapa o pang-sosyal nga mga produkto, kinsa mosulod usahay sa mga panimalay aron mamiktima. Gani, ang motira niini, usahay kaila ra nimo.

Ning panahon nga nag-anam nag kadaghan ang mga hinanib ni Satanas nga walay kukaluoy nga mokutlo sa kinabuhi sa ilang isigka-ingon, giawhag ang publiko nga magmabinantayon kanunay. Kun may makit-ang kadudaha’g lihok nga daw susama gayod sa nahisgotan na sa unahan, ayaw pagpanuko sa pagpanawag sa pulis. Labing maayo, di na lang gyud mamalit sa mga sinuroy’ng pahumot!