Akong tawgon ang atensiyon sa Department of Public Works and Highways (DPWH) niining pagpabaya sa kontraktor sa pag-ayo sa Ouano Ave., North Reclamation Area, Cebu City.
Samtang nagsigi og ugkal sa dan ang mga trabahador ang kontraktor niining maong proyekto wala magbutang og safety measures, sama sa suga o bisan unsang ekipo, aron paghayag sa lugar diin ilang gitrabaho. Kuyaw kaayong madisgrasya ang mga motorista labi na panahon sa kagabhion.
Wala ba mag-monitor ang DPWH niini? Kun dunay madisgrasya tungod niining ilang pagpabaya makiha sila sa mga biktima sa aksidente nga mangayo’g danyos.
Basic ug gikinahanglan man unta kining ipabuhat sa mga kontraktor apan nganong nagmika naman usab ang DPWH?
* * *
Makaapekto ba sa kandidatura ni Sen. Chiz Escudero kining "pagdaut" kaniya sa adunahang Rey ug Cecile Ongpauco, ginikanan sa iyang hinigugma nga si Heart Evangelista?
Kun dili maayo ang diskarte ni Sen. Chiz ako nagpaabut nga mosawum gayud ang iyang rating sa survey pagka-senador. Gani hinayhinay naman kining mikutkot sa iyang popularidad.
Motuo na man gud ang katawhan sa mga pagsaway batok kaniya ug ilang mapasanginlan na unya si Chiz sa panagbuwag niya ug sa iyang asawa nga si Christine Flores.
Bisan og kadudahan ang timing sa pagladlad sa mga ginikanan ni Heart sa mga sala ni Sen. Chiz apan mas tuhoan sila sa mga tawo.
Wala nay kapuslanan alang sa senador ang pagdepensa sa iyang kaugalingon pinaagi sa media.
Ang labing maayo niyang buhaton mao ang pagpakig-atubang sa mga ginikanan ni Heart ug hiluton ang ilang panagbangi labi na niining panahon sa eleksiyon.
Nagtoo ako nga modaug gihapon si Chiz sa iyang pagpapili pag-usab apan dili na sa unang tulo ka ang-ang.
Wala na usab siyay kahigayonan nga mahimong presidential timber. Sakaon na gani alang kaniya nga mahimong kandidato sa pagka-bise presidente sa 2016.
Magpabilin hinoon gihapon ang ka-popular sa senador sa mga mokuha’g litrato nga kanunay moawhag og "Say Chiz!"
* * *
Opisyal nang nagsugod ang campaign period alang sa mga magpapili sa mga lokal nga pwesto sa gobiyerno.
Bisan tuod og niadtong miaging tuig pa ang kadaghanan kanila nagsugod sa pagpangampanya wala pay nagpugong kanila niadto.
Karon ubos na sila sa mga lagda ug reglamento sa Commission on Elections (Comelec) kalabut sa gidak-on ug pagbutang sa ilang mga propaganda materials. Gilimitahan na usab ang ilang exposure sa radyo, telebisyon, pamantalaan ug magasin ug bisan gani sa social network.
Atong tan-awon kun aduna ba gayuy ngipon kining Comelec sa pagsilot niining mga tawo, labi na sa mga kandidato, nga dili motuman sa Election Code ug ubang gimbut-an sa ilang buhatan.
* * *
Kining gipatuman sa Comelec, nga gikuwestiyon karon sa Korte Suprema, nga exposure kon ads sa mga kandidato sa radyo ug telebisyon nagpakita lamang sa ka walay alamag sa maong komisyon kalabut sa palusot ug binuang sa mga kandidato nga adunay daghang campaign funds.
Samtang maayo ang tumong ug tuyo sa Comelec aron sa paglimiti sa magasto sa kandidato apan dako og bintaha niini ang mga incumbents nga kanunay nga sunodsunoron sa media sa ilang mga kalihukan. Ang mga bag-ong magpapili kinahanglang mugasto og dakung salapi aron lang matagad sa media.
Tinuod ba nga ang pagpugong sa mga kandidato nga makagasto og daku panahon sa kampanya makaminus sa korapsiyon? Ako nagtoong dili.
Bisan og pilay ilang magasto sa eleksiyon matintal gayud sila sa pagpangayo’g kickback gikan sa pork barrel nga ihatag matag tuig ngadto sa mga kongresista ug senador. Mao usab ang buhaton sa kadaghanang mga lokal nga opisyal nga adunay dakong gahin sa ilang mga proyekto.
Maayo pang pasagdan na lang kining mga politiko sa ilang pagasto panahon sa kampanya aron daghang mabulahan apil na ang media ug mga ordinaryong mga tawo nga mohatag og serbisyo ngadto kanila.
* * *
Email:msr1144@yahoo.com