Kalipay sa Semana Santa

Nangahas ko paghubad sa wali ni Pope Francis sa iyang pagbukas sa kalihokan sa Semana Santa: Si Hesus nisud sa Jerusalem. Kuyog ang malipayong mga disipulo. Naghisgot sa iyang mga milagro. Ang katawhan nagsaulog. Kalipay sa tibuok palibot.

Si Hesus nakapukaw sa bantogang paglaom, labi na sa mga kasingkasing sa mga yano, sa mga ubos, sa mga kabos, sa mga hinikalimtan, sa mga way bili sa mga mata sa kalibotan. Nakasabot siya sa tawhanong pag-antos, iyang napakita ang dagway sa Balaanong Kaluoy, nagpaubos siya aron paghilog sa lawas ug kalag.

* * *

Kini si Hesus. Kini ang kasingkasing nga nagtan-aw nato. Ang gugma ni Hesus bantogan. Atong gihangop si Hesus; kita malipayon sang nikuyog niya, sud nato ug uban nato isip higala, igsuon, ug Hari. Dan-ag sa atong kinabuhi. Banwag sa atong panaw.

Ang ato di kalipay gikan sa katigayonan. Kun dili gikan sa paghimamat ni Hesus. Sa kasayuran nga uban niya di ta mag-inusara, bisan makasugat sa mga pagsuway. Mokuyog ta ni Hesus. Labaw sa tanan kuyog siya nato ug gikugos ta niya. Mao ni ang atong kalipay, mao ni ang atong paglaom.

* * *

Nganong nisud man si Hesus sa Jerusalem? O ang mas maayong pangutana: Giunsa man pagsud ni Hesus sa Jerusalem? Ang katawhan nihangop niya isip Hari. Wa siya mosalikway ini, wa siya mopahilom nila. Unsang matanga sa pagkahari si Hesus? Nagsakay og asno; way ministro; way sundawo. Gidawat sa mga kabos nga nakakita og mas dakong kahulogan ni Hesus, sa pagtuong nagtug-an nila: “Kini ang Manluluwas.”

Si Hesus wa mosud aron pagdawat sa pasidungog alang sa mga Hari sa yuta. Nisud siya aron tungluhon ug yatakan, suma sa panagna ni Isaiah: “Nisud siya aron pagdawat sa koronang tunok, baston, ug puwang kapa. Iyang pagka hari gibugalbugalan. Nisud aron pagkatkat sa Kalbaryo, pagpas-an sa krus nga kahoy.”

* * *

Si Hesus nisud sa Herusalem aron pagpakamatay sa Krus. Maoy timaan sa pagkahari. Iyang trono ang Krus nga kahoy! Namalandong ko sa gisulti ni Benedict XVI sa mga kardinal, “Kamo ang mga prinsipe, apan sa gilansang nga Hari.” Si Hesus nipahamtang sa panuway, kahugaw, sa sala sa kalibotan sa iyang kaugalingon. Ug iya ning gilimpiyohan sa iyang dugo, sa kaluoy ug gugma sa Ginoo.

Akong apohan nisulti sa gamay pa ming bata: “Ang sapot sa patay way bolsa!” Ang paghigugma sa kuwarta, gahom ug krimen batok sa kinabuhi! Si Hesus sa Krus nakabatyag sa kabug-at sa panuway. Uban ang gahom sa gugma sa Ginoo iya ning gilupig, gipukan sa iyang pagkabanhaw. Mao ni gasa ni Hesus natong tanan. Ang Krus ni Kristo di mosangpot sa kasub-anan, kun dili sa kalipay! Sa kalipay sa kaluwasan!

* * *

Email: [email protected].