EDITORYAL - Ang pagkabanhaw ni Kristo
Karong adlawa saulogon sa Katoliko ang pagkabanhaw ni Kristo kinsa namatay sa krus nga gilansangan kaniya sa bukid sa Kalbaryo.
Tinuod nga ikatulong adlaw human si Kristo ikalubong, nabanhaw Siya, ang unang tawo sa kalibotan nga gibanhaw sa Dios gikan sa mga minatay.
Sa Biblia gipatin-aw sa Dios nga Iyang gibanhaw si Kristo aron ipakita Niya sa mga tawo nga tinuod ang Iyang gipamulong nga ang tanang tawo nga natawo sa kalibotan ug namatay inig-abot sa adlaw Iya kining bangunon ug buhion nga wa nay kamatayon.
Gipasabot sa Dios sa Biblia ngadto sa mga tawo nga wa motuo Kaniya nga maoy magbubuot sa tanang mga butang ug kang Cristo nga Iyang gisugo sa pagsangyaw sa Iyang (Dios) mga pulong, nga ang kamatayon ni Kristo alang lang sa mituo sa pagtulun-an nga giwale niini niadtong dinhi pa Siya sa yuta ug bisan karong tua na Siya sa langit.
Sa pagsangyaw ni Kristo sa maayong balita sa kaluwasan niadtong wala pa Siya ilansang sa krus may ubay-ubay na ka mga tawo ang nagpabautismo Kaniya ug sa mga Apostoles ug nagpasakop sa Iyang simbahan.
Unang natawag sa relihiyon nga gitukod ni Kristo mao ang mga kaliwat sa Hudio, dayon mga kaliwat sa Gentile kinsa nangawagtang human mosaka si Cristo sa langit ug nangamatay usab ang mga Apostoles nga nagdumala kanila dihang mibangon na ang mga bakakong manalagna sumala sa Biblia nga magpasalaag kanila ug nagtudlo og laing Kristo.
Ang ikatulong kaliwatan mao ang katawhan ni Kristo ug sa Dios niining ulahing mga adlaw nga nagpasakop sa relihiyong gitukod ni Kristo, nga matud sa Biblia di na mawala ug mao na kini hiabtan sa pagbalik ni Kristo sa yuta. Dinhi sa relihiyong gipakamatyan ni Kristo, mabuhi nga wa nay kamatayon ang maong mga tawo nga dad-on ni Kristo sa langit sa Iyang pagbalik sa adlaw sa paghukom.
Samtang ang laing grupo sa katawhan nga mabanhaw nga wa nay kamatayon didto sa linaw nga kalayo mao kadtong di ikauban ni Kristo sa langit ug gitino sa Biblia nga ang ilang gidaghanon sama sa bas sa dagat.
- Latest
