Sigon sa Balaang Kasulatan, napulo ka mga sugo ang gisulat sa Diyos sa bato ug gihatag ngadto kang Moses didto sa Mount Sinai liboan na ka mga katuigan ang nakalabay.
Ang ikalimang sugo nagaingon ‘Thou Shall Not Kill’ kun dili ka magpatay, kay Siya man ang naghatag og kinabuhi sa tawo, Siya usab ang adunay katungod sa pagkuha niini. Nan, naunsa na man kita karon nga wala may adlaw nga wala’y patay nga mahitabo? Gani, didto sa Lahad Datu sa Sabah sayesenta na kapin ka mga kinabuhi ang nangakalas tali sa Malaysian police ug sa mga sakop ni Sultan Kiram sa Sulu.
Dinhi sa atoa, usa ka kawani sa DENR nga si Jonathan Pepito ang giambusan patay pinagi sa pagpusil kaniya sa ulo og sa iyang sampot. Kun dili pinaagi sa pamusil karong panahona, hunosan sa kinabuhi ang tawo pinaagi sa dunggab, tigbas ug ang uban sab yanohon ang paghikog agi’g pagtapos sa hinulaman nilang kinabuhi.
Ang mga inahan usab nga wala’y puangod ug kalooy, patyon ang bata nga bag-ohay pa nilang gihimugso pinaagi sa paglabay sa basurahan o paglabay ba hinuon ngadto sa sapa ug dagat.
Nahikalimot na ang mga kriminal sa ikalimang sugo sa Diyos sa dili pagpatay. Gipasulabi nila ang kapungot, kasuko, panimalos ug uban pang mga bayolente ug yawan-ong hunahuna nga magpasulabi sa ilang galamhan.
Gilapas ug giyatakan nila ang ikalimang sugo sa Diyos nga ‘Thou Shall Not Kill’.