EDITORYAL - Ang “No Permit, No Exam” policy sa goberno

Kining  maong  pamaagi  o sistema  nga  gisagop  sa eskuylahan  sa goberno nga  mipatuman  niining “No Permit, No Exam” policy tataw  kaayo  nga  panaugdaog  sa  mga  kabus  nga tinun-an.

Mura  ba  og    uyamot  na  kaayo  ang  maong  matang  sa eskuylahan nga  kun  way mobayad  nga  estudyante, di  makabarug  sa  iyang  pagka-institusyon  nga dangpanan  sa  mga  tinun-an  nga  kabus. 

Kaisug  mokampanya  sa  goberno  nga  kinahanglang  mahimong  edukado  ang  tanang  Filipino.

Gikan  sa day care  center  hangtud  sa  mga  kolehiyo  ug  mga  unibersidad  niini gigahinan  kini  sa kagamhanan  matag  tuig  og  subsidiya aron  nga  moedukar   ug  mopalampos  sa ma-kabus man  ug  adunahan  nga  estudyante  kinsa  nagtinguha  nga  molampos  og  kurso.

Apan  nganong  di man  makahatag  og  higayon  sa  mga  kabus  nga  estudyante  kinsa  di dayon  makabayad   sa tuition gumikan  sa kakabus?

Lahi baya  ang  mga  magtutudlo  sa tunghaan  sa goberno  ug  sa pribado,  kay  sa  goberno matag  magtutudlo  gigahinan  na  og  suhol  sa tibuok  tuig  aron di  sila  magutman  sa pagpas-an  sa ilang  tahas  pag-edukar  sa  mga tinun-an.

Ang pribadong  tunghaan  gitawag kini  nga  eskuylahan  sa  mga  kuwartahan  tungod  kay ang  mga  magtutudlo  nagsalig  sa bayad  sa  mga  estudyante  nga  kun  way mobayad  wa usab  silay  suhol  nga  madawat.

Kun  ang  pribadong  eskuylahan  mopatuman  og  no permit, no exam policy  sa ilang  mga tinun-an,  di nato angay  nga  basulon  ang  mga  tag-iya  niini  kay  negosyo  ang  anaa  sa hunahuna  sa  mga  tag-iya  niini.

Tinuod ang  sa goberno, kun atong basehan  ang  gipahayag  sa  usa  ka  dakong  opisyal  sa Kapitolyo, kini  miingon  nga “gikinahanglan  man  tinuod  nga  moginansya  ang  goberno  sa ipadagan  niining  mga  institusyon, apan ginansya   nga  may  kaangayan, nga bisan  gamay, basta sa samang  higayon nakasilbi  usab  kini sa  mga  kabus  ”

Baruganan  kini  ni acting Gov . Agnes Magpale  bahin  sa isyu  sa south bus terminal.

Busa  kun  ang usa  ka  eskuylahan  sa goberno  mopatuman  sa no permit , no exam policy, tataw  kaayo  nga  ang  mga  opisyal  ning eskuylahana  way laing tuyo  kundi ang  pagpaburot  sa ilang  ginansya apan wa magtan-aw  kun  nakasilbi  ba  nga may  kaangayan  ngadto  sa  mga  kabus, ug  usa  kini ka tataw  kaayo  nga  panaugdaog  ug  pagbugal-bugal  sa  mga  kabus  nga tinun-an.