Kalma lang!

Si Mayor Michael Rama kanunay nga mobalik-balik sa pag-ingon atul sa iyang press conference nga ang iyang kontra nga si Kongresista Tomas R. Osmeña desperado na kuno kaayo.

Kanunay niya nga balik-balikon sa among interview nga mapilde g’yud niya si Osmeña sa eleksyon karong Mayo 13. Apan kun ang iyang batasan ning mga adlawa maoy atong basihan, mora’g desperado man ‘sab ang mayor. Kaniadto, buotan kaayo si Mayor Rama nga dili gayud masuko, apan karon gamay lang isyu, mosinta dayon ug moingon nga “Kinsa may mayor? Ikaw ba’y mayor?” Angayan pa ba gud nga ipangutana kun kinsa’y mayor sa dakbayan kun tarung ka’g huna-huna? Angay nga moadto si Mayor Rama sa ward sa mga nalisoan sa maayong pangisip kun gusto siya nga mangutana niini. Apan kami nga mga sakop sa media, ilabi na ako, moisip nga hinambugero kaayo ang pagluwat sa maong pamahayag. Isip reporter gipangutana nako ang mayor kagahapon kun pila g’yud ang ihatag nga cash assistance sa mga senior.

Gusto ra man unta nako nga ma-confirm kay ang secretary ni Rama nga si Belinda Navascues atol sa tigum sa mga lider sa senior citizens, mipahibalo na man nga tag P4,000 ang ipanghatag sa matag senior, unya himoon kini karong Lunes ug Martes.

Nasuko na man hinoon ang mayor. Wala kuno mohatag og pagtugot nga mohimo sa maong announcement ang iyang mga sakop. Pastilan, kun mao na, nagbuot-buot ra diay ang mga sakop ni Rama apil na ni City Administrator Jose Marie Poblete? Diha man ‘sab gani sa maong tigum ang pangulo sa Office of Senior Citizens Affairs (OSCA) nga si Rolando Llaguno. Kun magpirmi ang bati nga batasan na karon ni Mayor Rama, tingali dunay mga tawo nga naghuna-huna unta sa pagdapig kaniya, adto na lang sa iyang kontra. Ang maayong himoon nimo Mayor Mike mao nga kun adunay pangutana sa reporter, paminawa pag-ayo ug han-aya ang imong argumento aron dili kaayo magliko-liko ang imong tubag.

Unsa may buot ipasabot nimo nga kadtong kalihukan nga gihimo kagahapon sa pangulo sa OSCA sayop kadto? Abi kay wala ka makatambong? Kun mao man gani kana ang anaa sa imong huna-huna, wala nako butangi og pulong ang imong ba-ba, hala, taktaka ug pulihi ang imong hepe sa OSCA! Igo lang nangutana ang reporter aron tin-awon ang usa ka isyu para dili maglibog ang mga senior citizens unya masuko ka? Unsa gud ka nga klaseha sa pagka mayor?

Trabaho sa reporter ang pagsabwag og tukma nga kasayuran mao nga gusto nako nga sutaon nganong si Belinda Navascues mipahibalo na man nga tag P4,000 ang madawat sa mga senior.

Sayonan ka, didto ang hapit tanan nimo nga department head sa tigum sa mga lider se senior citizens, ug giladlad na kon unsay himoon nila sa Lunes ug Martes, unya matud pa nimo ikaw wala ka makahibalo?

Kun mao kana, namakak diay si Belinda Navascues? Gipahibalo man gani ni Navascues nga gitawgan ka niya sa wala pa magsugod ang maong kalihukan aron nga kun makahigayon ka makatambong ka sa tigum.

Pastilan, kalma lang gud Mayor Mike. Ayaw kaayo pagpadala sa kulba sa eleksyon. Kon duna kay gikasuk-an, ayaw apila sa imong kasuko ang mga reporter. Lahi na g’yud kaayo og batasan si Mayor Rama ning higayona. Kagahapon gipangutana siya sa laing reporter, wala motubag kay wala pa kuno siya makadawat sa suwat sa usa ka NGO.

Dihang gitunolan siya sa kopya sa suwat ug giawhag nga mo-react, nasuko na ‘sab. Nganong wala man nimo basaha ang suwat nga abogado ka man, bright ka man kaha?

Pwede ra man ‘sab nga moingon ka lang sa kalma nga pagkasulti nga dili lang usa mohatag og reaksyon kay basahon pa nimo, dili kay kasab-an nimo ang reporter ug papangayoon og pasaylo. Porbida!