Ang Guyabano

Ang akong babayeng pag-umangkon, nga kalit lang mibutho sa among pinuy-anan sa siyudad sa Cebu, nahingangha ko nga naluoy sa kahimtang niya nga mihugo pag-ayo ang panglawas kay may gihambin diay nga mabug-at nga balatian. Permi lang nagpakemo sa iyang sakit sa suso nga gisawo sa kanser.

Bisa’g may ikasarang kini sa paggasto alang sa operasyon sa iyang sakit, gibalibaran niya ang sugyot sa iyang doktor, nga labing dali maoperahan dayon kay grabe na ang iyang kanser. Gani ako kadtong gihikap ang suso, morag dunay mga daghang tibugol sa ilawom niini. Apan gidasig nako nga di mahadlok.

“Ah! Basta di gyud ko magpaopera,” niya pa, “mamatay pa hinoon kog dali, may pa mokaon ko… basig may alibyo pa sa tabang sa pag-ampo sa Ginoo.” Susama sa akoy nag-antos nagtan-aw sa iyang kapait. Matud niya, dako siya’g pagtoo nga mamaayo pinaagi sa herbal supplement o mga presko nga bunga sa kahoy.

Busa gitanyagan nako sa pagsulay sa Guyabano.  Kadaadlaw sige la’g kaon sa maong prutas. Usahay i-shake kini uban ang cauliflower o kamunggay. Tungod kay daghan nang nasayod sa makuhang benepisyo sa Guyabano, nihit na kaayo kini Makita sa merkado. Sagrado kining prutasa niadtong nakasulay na.

Matud sa akong pang-umangkon, sud sa unang tulo ka bulan, migaan ug medyo inanay niminus ang panakit nga gibati niya. Dangtan og unom ka bulan, medyo mihumok na kadtong pipila ka nanggahing tibugol. Karon tua na mipauli sa Manila, tuig na karon ang milabay.  Matud niya niarang-arang na nga mialibyo.

Busa maayo tingali mananom kita og Guyabano, kay matud pa sa mga eksperto sa nutrisyon, may benepisyo kini alang sa kahimsog sa panglawas. Kay mopalig-on kini sa mga maayong selyula ug mopakgang sa sakit nga kanser.