Kun hisgotan na gani ang babaye, alang sa ubang mga lalaki , ang babaye maoy ikaduha nilang Bathala, ang numero uno nilang Bathala mao ang kuwarta, apan ang tinuod nga Bathala wa nila ilhi.
Apan ang mga lalaki nga nakaila sa tinuod nga Bathala, maayo kaayo momahal ug mopangga sa babaye tungod kay sugo sa tinuod nga Bathala nga angay mahalon ang babaye ilabi na kun imo na kining asawa. “Kay ang bana mao ang ulo sa asawa maingon man nga si Cristo mao ang ulo sa Iglesia ug Siya ang manluluwas sa Iyang lawasâ€, usa kini ka tin-aw kaayong pagpasabot sa Biblia.
Kun gimahal ni Cristo ang Iyang Iglesia nga maoy Iyang luwason sa Iyang pagbalik nganhi sa yuta, ingon usab niini ang pagmahal sa usa ka bana sa iyang asawa nga andam niyang ibuhis ang iyang kinabuhi alang-alang sa iyang asawa, sama sa gibuhat ni Cristo nga nagpalansang sa krus tungod ug alang-alang sa Iyang lawas nga mao ang Iglesia.
Gipakasama sa Dios ang usa ka babaye o asawa sa lawas sa bana o lalaki, diin kun sakitan ka kun imong kusion ang imong kaugalingong panit sa lawas o kaha sakitan ka kun imong unayon pagkulata ang imong kaugalingong lawas, ayaw usab kana buhata ngadto sa imong asawa kay isip imong lawas, sakitan siya kun imong dapatan.
Kun gilaksi man sa Dios ang walang gusok ni Adan kay gihimong Eva, gituyo sa Dios aron sa kiliran idug, ug sa atubangan angay gakson, sapupohon, ug ipabati kaniya ang dinagaang sa kainit sa gugma gikan sa kasingkasing nga nahimutang sa ibabaw nga bahin sa walang gusok sa lalaki. Wa himoa sa Dios ang babaye gikan sa tiil sa lalaki aron di kini patid-patiran, wa buhata sa Dios ang babaye gikan sa kamot sa lalaki aron di kini kulatahon pinaagi sa kumo ug sagpa o pitlok ba.
Apan gihimo sa Dios ang babaye gikan s a walang gusok sa lalaki aron mahalon, panggaon, silbihan hangtud sa katapusang gutlo sa iyang kinabuhi.
Kun may mga babaye mang giabusohan sa bana, malagmit misipyat kini pagpili sa lalaki ug di siya gusok nga gitangtang gikan sa maong lalaki.
May mga panultihon nga nagkanayon “ang kalamposan sa usa ka bana mag-agad sa iyang asawa nga anaa kanunay sa iyang kiliran isip iyang advicer, apan masugamak sa kapakyasan ang usa ka bana kun ang asawa mao nay manguna kaniya isip komanderâ€. Congrats, ug happy, happy women’s month.